దారుణ యాప్ కేసులో హైదరాబాద్ సైబర్ క్రైం పోలీసులు మరొకరిని అరెస్ట్ చేశారు. స్తంభింపజేసిన ఖాతాల్లో నుంచి అక్రమంగా నగదు బదిలీ చేసుకున్న ఆనంద్ను పోలీసులు అదుపులోకి తీసుకున్నారు. బేగంపేటకు చెందిన ఆనంద్ ఎస్బీఐ ఖాతాకు కోటీ 18లక్షల నగదు బదిలీ అయినట్లు సైబర్ క్రైం పోలీసుల దర్యాప్తులో తేలింది. ఈ నగదు కోల్కతా, గురుగావ్లోని ఐసీఐసీఐ బ్యాంకుల నుంచి బదిలీ అయినట్లు సైబర్ క్రైం పోలీసులు గుర్తించారు.
దాదాపు 200 కోట్లు…
సులభ రుణాల పేరుతో మొబైల్ అప్లికేషన్ల ద్వారా రుణాలు ఇచ్చిన పలు సంస్థలు అధిక వడ్డీ కోసం రుణగ్రహీతలను వేధించాయి. రుణ యాప్ నిర్వాహకుల వేదింపులు తట్టుకోలేక ఏడుగురు మృతి చెందారు. రుణ యాప్ నిర్వాకాలపై పలు ఫిర్యాదులు రావడంతో హైదరాబాద్ సైబర్ క్రైం పోలీసులు కేసులు నమోదు చేసి ప్రధాన సూత్రధారి ల్యాంబోతో పాటు 28మందిని అరెస్ట్ చేశారు. నిర్వాహకులకు చెందిన ఖాతాలు సీజ్ చేసి అందులో ఉన్న దాదాపు 200కోట్ల రూపాయలను స్తంభింపజేశారు. రుణ యాప్ నిర్వాహకులు మాత్రం సైబర్ క్రైం పోలీసుల పేరిట కోల్కతా, గురుగావ్లోని ఐసీఐసీఐ బ్యాంకులకు లేఖలు రాశారు.
పోలీసులు ఆరా…
స్తంభింపజేసిన ఖాతాల్లో నగదు బదిలీ చేసుకునే అవకాశం కల్పించాలని లేఖలో పేర్కొన్నారు. పోలీసుల లేఖగానే భావించిన సదరు బ్యాంకు అధికారులు నగదు బదిలీకి అవకాశం కల్పించారు. గత నెల 8, 13 తేదీల్లో రెండు ఖాతాల నుంచి ఆనంద్ పేరుతో ఉన్న ఎస్బీఐ ఖాతాకు కోటి 18లక్షలు బదిలీ అయ్యాయి. నగదు బదిలీ వ్యవహారం బ్యాంకు అధికారుల నుంచి సైబర్ క్రైం పోలీసులకు చేరడంతో కేసు నమోదు చేసుకుని దర్యాప్తు చేపట్టారు. ఎస్బీఐలోని ఖాతా చిరునామా ఆధారంగా బేగంపేటకు చెందిన ఆనంద్ను అరెస్ట్ చేశారు. ఆనంద్ ఖాతా నుంచి నగదు ఎక్కడికి బదిలీ అయిందనే విషయాలను సైబర్ క్రైం పోలీసులు సేకరిస్తున్నారు. రుణ యాప్ల కేసులో అరెస్టు అయిన పలువురు నిందితులు ఇప్పటికే బెయిల్పై బయటికి వచ్చారు. ఖాతాల్లో నుంచి నగదు బదిలీ వ్యవహారంలో ఎవరెవరికీ సంబంధాలున్నాయనే కోణంలో సైబర్ క్రైం పోలీసులు ఆరా తీస్తున్నారు.
సంబంధిత కథనం: చైనా రుణయాప్లో కేసులో దర్యాప్తు ముమ్మరం
