నిజామాబాద్ జిల్లా ఇందల్వాయి మండలం చెర్లపల్లిలో దారుణం జరిగింది. తాగొచ్చి డబ్బుకోసం వేధిస్తున్న భర్తను ఓ మహిళ హత్య చేసింది. గ్రామానికి చెందిన చాకలి సాయికుమార్, సునీత దంపతులకు ఇద్దరు కుమారులు, ఒక కుమార్తె. మద్యానికి బానిసైన సాయికుమార్ డబ్బుకోసం భార్యను తరచు వేధించేవాడు. ఈ క్రమంలో గురువారం కూడా భార్యతో గొడవపడ్డాడు. విసుగు చెందిన సునీత భర్త తలపై బండరాయితో కొట్టింది.
మద్యం మత్తులో ఉన్న సాయికుమార్ అక్కడికక్కడే కుప్పకూలిపోయాడు. సమాచారం అందుకున్న పోలీసులు ఘటనా స్థలికి చేరుకుని పరిశీలించారు. నిందితురాలి ఫిర్యాదుతో కేసు నమోదు చేసుకుని దర్యాప్తు చేస్తున్నారు.
ఇదీ చూడండి: కొడంగల్ పరిధిలో పిడుగుపాటుతో 32 గొర్రెలు మృతి
