భర్తను చంపింది, జైలు పాలయ్యింది.. పిల్లలను ఒంటరి చేసింది..!

ఆటో ఢీకొనడంతో ఏడాది కాలంగా భర్త మంచానికే పరిమితమయ్యాడు. పిల్లల పోషణ రోజురోజుకూ భారమవుతోంది. ఇదే విషయమై దంపతుల మధ్య తరచూ గొడవ జరుగుతోంది. కానీ.. ఈసారి జరిగిన గొడవ ఆ కుటుంబాన్ని ఛిన్నాభిన్నం చేసింది. భర్త ఈ లోకం నుంచే వెళ్లిపోగా.. ఇందుకు కారణమైన భార్య కటకటాల పాలయ్యింది. పిల్లలు అనాథలయ్యారు.

మెదక్ జిల్లా మనోహరాబాద్ మండలం పర్కిబండలో దారుణం చోటుచేసుకుంది. కుటుంబ కలహాలతో విజయలక్ష్మి అనే మహిళ తన భర్తను రోకలి బండతో మోది హతమార్చింది.

గ్రామానికి చెందిన మురళి, విజయలక్ష్మి దంపతులు. ఏడాది క్రితం ఆటో ఢీకొనడంతో మురళి కాలు విరిగింది. అప్పటి నుంచి మంచానికే పరిమితమయ్యాడు. ఈ నేపథ్యంలో పిల్లల పోషణ విషయమై గత కొంతకాలంగా దంపతుల మధ్య తరచూ గొడవలు జరుగుతున్నాయి. సోమవారం రాత్రి ఇద్దరి మధ్య గొడవ జరిగింది. ఆవేశంతో విజయలక్ష్మి భర్త తలపై రొకలి బండతో బలంగా మోదింది. తీవ్ర రక్తస్రావంతో మురళి అక్కడికక్కడే మృతి చెందాడు.

స్థానికుల సమాచారం మేరకు పోలీసులు ఘటనా స్థలికి చేరుకున్నారు. క్లూస్​ టీం సహాయంతో ఆధారాలు సేకరించారు. నిందితురాలు విజయలక్ష్మిని అదుపులోకి తీసుకున్నారు. ఘటనా స్థలాన్ని తూప్రాన్ డీఎస్పీ కిరణ్ కుమార్, ఎస్సై రాజుగౌడ్ పరిశీలించారు.