వై.ఎస్. వివేకానందరెడ్డి హత్య కేసులో సీబీఐ విచారణ ముమ్మరంగా సాగుతోంది. విచారణ వేగవంతం చేసిన అధికారులు.. ఆంధ్రప్రదేశ్లోని కడప కేంద్ర కారాగారంలోని అతిథి గృహంలో 8వ రోజు విచారణ నిర్వహిస్తున్నారు. వైకాపా కార్యకర్త కిరణ్ కుమార్ తండ్రి కృష్ణయ్యను అధికారులు ప్రశ్నిస్తున్నారు.
వివేకా మాజీ కారు డ్రైవర్ దస్తగిరిని వరుసగా 5 రోజుల పాటు ప్రశ్నించిన సీబీఐ.. కీలక సమాచారం రాబట్టినట్లు తెలిసింది. వివేకా ఇంటి సమీపంలోని ముళ్లపొదల్లోకి దస్తగిరిని తీసుకెళ్లి పరిశీలించారు. హత్య జరిగిన రోజు నిందితులు అక్కడేమైనా నక్కి ఉన్నారా అనే కోణంలో ఆరా తీసినట్లు సమాచారం.
పులివెందులకు చెందిన వైకాపా కార్యకర్త కిరణ్ కుమార్ యాదవ్‌ను విచారణ చేశారు. కిరణ్ సోదరుడు సునీల్‌ కుమార్ యాదవ్‌తో పాటు కుటుంబసభ్యులను కూడా ప్రశ్నించారు. ఇక సీబీఐ అధికారుల అడిగిన మేరకు.. రవాణా శాఖ సిబ్బంది కొన్ని వాహనాల వివరాలు అందజేశారు. ఆ తర్వాత పులివెందుల వెళ్లిన సీబీఐ బృందం.. హత్య జరిగిన రోజు అనుమానాస్పదంగా ఇన్నోవా వాహనం తిప్పిన యజమాని మట్కా రవితో పాటు డ్రైవర్ గోవర్దన్‌ను ప్రశ్నించింది.
ఆదివారమూ సీబీఐ అధికారులు విచారణ జరిపారు. వివేకానందరెడ్డి మాజీ డ్రైవర్ వెంకటేశ్‌ను ప్రశ్నించారు. ఓ మహిళనూ పలు అంశాలు అడిగి తెలుసుకున్నట్లు సమాచారం. సాయంత్రం పులివెందుల వెళ్లి వివేకానందరెడ్డి ఇంటి పరిసర ప్రాంతాలను పరిశీలించారు. వివేకానందరెడ్డి కుమార్తె సునీతతో అధికారులు మాట్లాడారు. ఆమె నుంచి మరిన్ని వివరాలు రాబట్టిన దర్యాప్తు బృందం.. విచారణ మొత్తాన్నీ గోప్యంగా ఉంచారు.
ఇదీ చదవండి: etela rajender: జె.పి.నడ్డాను కలిసిన ఈటల రాజేందర్
