ఏపీలోని రాయలసీమ.. అందులోనూ కడప జిల్లా జమ్మలమడుగు నియోజకవర్గం. ఈ పేరు వింటేనే ముందుగా గుర్తుకొచ్చేది ఫ్యాక్షన్. ఎన్నికల సమయంలో ఘర్షణలు, గొడవలు ఎక్కువగా జరుగుతుంటాయి. పోలీసులకు కంటి మీద కునుకు లేకుండా చేస్తుంది. అలాంటి ప్రాంతంలో 40 ఏళ్లుగా అందరూ ఒకమాటపై ఉంటూ సర్పంచ్ను ఏకగ్రీవంగా ఎన్నుకుంటూ అందరికీ ఆదర్శంగా నిలుస్తున్నారు శేషారెడ్డి పల్లె వాసులు.
జిల్లాలో ఆదర్శ గ్రామం..
శేషారెడ్డి పల్లె.. రాళ్ల గుండ్లకుంట అని కూడా పిలిచే ఈ గ్రామంలో 600 మందికి పైగా నివాసముంటారు. ఈ పంచాయతీలో సర్పంచ్ పదవి కోసం ఎప్పుడు ఎన్నికలు జరుగవు. గ్రామ పెద్దలు ఒక నిర్ణయానికి వచ్చి అభ్యర్థిని ఏకగ్రీవంగా ఎన్నుకుంటారు. జమ్మలమడుగు పట్టణానికి ఐదు కిలోమీటర్ల దూరంలో ఉన్న ఈ గ్రామం.. స్వచ్ఛందంగా మద్యం నిషేధించటంతో పాటు.. ఇతర చెడు వ్యసనాలను బహిష్కరించి.. జిల్లాలో ఆదర్శ గ్రామంగా నిలిచింది. 40 ఏళ్ల చరిత్ర గల శేషారెడ్డి పల్లికి ఇప్పటి వరకూ నలుగురు సర్పంచులుగా వ్యవహరించారు. ఈ గ్రామ పోలీస్ రికార్డులో ఒక్క కేసు కూడా నమోదు కాకపోవటం గమనార్హం.
ఈసారి అక్కడ సర్పంచ్గా పనిచేసే అవకాశం మహిళకు వచ్చింది. దీంతో గ్రామస్థులంతా కూర్చొని ఒక నిర్ణయానికి వచ్చిన తర్వాత ఏకగ్రీవంగా అభ్యర్ధిని ఎన్నుకోనున్నట్లు స్థానికులు చెబుతున్నారు.
ఇవీ చూడండి...: తిరుమల కొండపై పంచాయతీ ఎన్నికలు జరుగుతాయా?
