Congress On Job Notification: ఉద్యోగాల భర్తీ విషయంలో సీఎం కేసీఆర్ ప్రకటన తీవ్ర నిరాశకు గురిచేసిందని ఎంపీ కోమటిరెడ్డి వెంకట్‌రెడ్డి ఆగ్రహం వ్యక్తం చేశారు. 2018 ఎన్నికల సందర్భంగా నిరుద్యోగ భృతి ఇస్తామని అన్నారని.. ఆ సంగతి ఏమైందని ప్రశ్నించారు. హుజూరాబాద్ ఎన్నికల సమయంలో అన్ని ఖాళీలు భర్తీ చేస్తామని చెప్పారని.. బిస్వాల్ కమిటీ లక్షా 91వేల ఉద్యోగ ఖాళీలున్నాయని తెలిపిందన్నారు. ఇచ్చిన హామీకి అనుగుణంగా అన్ని ఉద్యోగ ఖాళీలను భర్తీ చేయాలని డిమాండ్ చేశారు. రాష్ట్ర ఆర్థిక పరిస్థితి బాగాలేదని.. అందుకే నిరుద్యోగ భృతి ఇవ్వలేదని చెప్పి.. కేసీఆర్ క్షమాపణ చెప్పాలని డిమాండ్ చేశారు.
రేపు సీఎంను కలుస్తా..
ఉద్యోగాల భర్తీ ప్రకటనపై వ్యక్తిగతంగా హర్షం వ్యక్తంచేస్తున్నానని పీసీసీ వర్కింగ్ ప్రెసిడెంట్, సంగారెడ్డి ఎమ్మెల్యే జగ్గారెడ్డి తెలిపారు. సీఎంకు ప్రత్యేకంగా ధన్యవాదాలు తెలియజేస్తున్నానన్నారు. రేపు సీఎంను కలిసేందుకు అపాయింట్‌మెంట్ కోరుతానని జగ్గారెడ్డి వెల్లడించారు. హౌసింగ్ విభాగాన్ని మళ్లీ తెరవాలని సీఎంకు విజ్ఞప్తి చేస్తానని చెప్పారు. బిస్వాల్ కమిటీ నివేదిక ప్రకారం మిగతా పోస్టులు భర్తీ చేయాలని డిమాండ్ చేశారు. ఈ విషయంలో తమ పార్టీలో భిన్నాభిప్రాయాలు లేవని జగ్గారెడ్డి స్పష్టం చేశారు.
ఎన్నికల స్టంట్..
ఉద్యోగాల భర్తీపై కేసీఆర్ ప్రకటనను ఎన్నికల స్టంట్గా తాము అభిప్రాయపడుతున్నట్లు కాంగ్రెస్ ఎమ్మెల్సీ జీవన్రెడ్డి చెప్పారు. ఉద్యోగ ఖాళీలపై బిస్వాల్ కమిటీ ఇచ్చిన నివేదికలో రాష్ట్రంలో లక్షా 91 వేల పోస్టులు ఉన్నట్లు వెల్లడించిందన్నారు. పదవీ విరమణ పొందిన వారినీ కలిపితే ఆ సంఖ్య రెండున్నర లక్షలు ఉంటాయని చెప్పారు. ఉద్యోగాల భర్తీ ఆలస్యం కావడంతో ఎందరో నిరుద్యోగులు ఆత్మహత్యలు చేసుకున్నారని విమర్శించారు.
కేసీఆర్ ప్రకటనను నేను నమ్మను..
ఉద్యోగాల భర్తీపై అసెంబ్లీలో ముఖ్యమంత్రి కేసీఆర్ చేసిన ప్రకటనను తాను న‌మ్మన‌ని మునుగోడు ఎమ్మెల్యే కోమటిరెడ్డి రాజగోపాల్ రెడ్డి స్పష్టం చేశారు. ఇప్పటివరకు సీఎం చెప్పినవి ఏవీ చేయ‌లేద‌ని విమర్శించారు. వ‌చ్చే ఎన్నిక‌ల్లో కేసీఆర్‌ను ప్రజ‌లు గ‌ద్దె దించ‌డం ఖాయ‌మ‌‌న్నారు. హుజూరాబాద్‌లో కోట్లు ఖ‌ర్చు పెట్టినా ప్రజ‌లు మాత్రం ఈటల‌ను గెలిపించారని రాజగోపాల్ అ‌న్నారు.
ఇదీచూడండి: సీఎం కేసీఆర్ కీలక ప్రకటన.... రాష్ట్రంలో 80,039 ఉద్యోగాలకు నోటిఫికేషన్‌
