సమ్మె విరమించి విధుల్లో చేరేందుకు వచ్చిన ఆర్టీసీ కార్మికులను పోలీసులు అరెస్టు చేస్తున్నారు. డిపోల వద్ద భారీగా పోలీసులు మోహరించారు. తాత్కాలిక సిబ్బంది ఐడీ కార్డులు పరిశీలించాకే విధుల్లోకి అనుమతిస్తున్నారు. ప్రత్యామ్నాయ బస్సులు యథావిధిగా నడుస్తున్నాయి.
సికింద్రాబాద్ హకీంపేట్ డిపో వద్ద విధులకు హాజరయ్యేందుకు వచ్చిన 15 మంది కార్మికులను పోలీసులు అరెస్టు చేసి బొల్లారం పీఎస్కు తరలించారు. సమ్మె విరమించినా విధుల్లో చేర్చుకునేందుకు ప్రభుత్వం నిరాకరించడం సరైన చర్య కాదని కార్మికులు ఆవేదన వ్యక్తం చేస్తున్నారు. వెంటనే తమను విధుల్లోకి తీసుకోవాలని డిమాండ్ చేశారు. హకీంపేట్ డిపో వద్ద పెద్దఎత్తున పోలీసులు భారీ బందోబస్తు ఏర్పాటు చేశారు.
ఇంట్లో నుంచి...
ఖమ్మం డిపో వద్ద పోలీసులు పటిష్ఠ బందోబస్తు ఏర్పాటు చేశారు. ఓ మహిళా కార్మికులు ఇంట్లో సమావేశమైన ఐదుగురు కార్మికులను పోలీసులు అదుపులోకి తీసుకున్నారు. బుర్హన్పురంలో విధుల్లో చేరేందుకు వస్తున్న ఆర్టీసీ కార్మికులను పోలీసులు మధ్యలోనే అడ్డగించి అదుపులోకి తీసుకున్నారు.
డిపో ముందు ఆందోళనలు
నాగర్ కర్నూల్ ఆర్టీసీ డిపో వద్ద తమను విధుల్లోకి తీసుకోవాలంటూ.... డిపో మేనేజర్తో కార్మికులు వాగ్వాదానికి దిగారు. పోలీసులు వారిని అడ్డుకున్నారు. ప్రభుత్వానికి వ్యతిరేకంగా నినాదాలు చేస్తూ... డిపో ముందు బైఠాయించి ఆందోళన చేస్తున్నారు. పిల్లల స్కూల్ ఫీజు కూడా కట్టలేక పోతున్నామంటూ మహిళా కార్మికులు ఆవేదన వ్యక్తం చేశారు.
వరంగల్లో పటిష్ఠ భద్రత
వరంగల్ అర్బన్ జిల్లాలోని ఆర్టీసీ బస్ డిపోల వద్ద పోలీసులు భారీ బందోబస్తు చేపట్టారు. వరంగల్ 1, వరంగల్ 2 డిపోతో పాటు హన్మకొండ బస్ డిపో వద్ద పోలీసులు తెల్లవారుజాము మొహరించి.. ఏలాంటి అవాంఛనీయ ఘటనలు చోటు చేసుకోకుండా కట్టుదిట్టమైన భద్రతను ఏర్పాటు చేశారు. కార్మికులు డిపోల వద్దకు రాకపోవడంతో హన్మకొండ బస్ ప్రాగంణంలో ప్రశాంత వాతావరణం నెలకొంది.
ఇదీ చూడండి: ఆర్టీసీ సమస్య ముగింపునకే కేబినెట్ సమావేశం!
