కరోనా చికిత్సలో మరో ముందడుగు వేసేందుకు వైద్యులు ప్రయత్నిస్తున్నారు. ఇప్పటి వరకూ ద్రవరూపంలో ఉన్న ప్లాస్మాను పొడిగా మార్చే విధానాన్ని ఆవిష్కరించారు. నిమ్స్‌ వైద్యనిపుణులు మధుమోహన్‌రావు నేతృత్వంలో డాక్టర్‌ శ్రీనివాస్‌, డాక్టర్‌ రవి, రాజీవ్‌ బృందం ఈ పరిశోధనల్లో పాలుపంచుకున్నారు.
కరోనా బారిన పడి కోలుకున్న దాతల నుంచి సేకరించిన ప్లాస్మా ద్వారానే ఈ పౌడర్‌ను తయారు చేస్తున్నారు. లియోఫిలైజ్డ్ యంత్రంతో ప్లాస్మాలోని నీటి శాతాన్ని తొలగించి... చివరగా మిగిలిన పదార్థాన్ని పొడిలాగా మార్చుతారు. గ్లూకోజ్‌ మాదిరిగా మారే ఈ పొడిలో కరోనాను ఎదుర్కొనే ప్రతిరక్షకాలు, ప్రొటీన్లు మాత్రమే మిగులుతాయి.
అత్యవసర సమయాల్లో..
సాధారణ ప్లాస్మా నిల్వ, తరలింపునకు మైనస్‌ 40 డిగ్రీల ఉష్ణోగ్రత అవసరమవుతోంది. కానీ, ఈ పొడికి మాత్రం అలాంటి ప్రత్యేక సౌకర్యాలు లేకుండానే సాధారణ ఉష్ణోగ్రత వద్ద నిల్వచేసే వీలుంటుంది. మారుమూల ప్రాంతాలకూ దీనిని తీసుకువెళ్లి.. బాధితులకే అక్కడే చికిత్స అందించవచ్చు. వయసు, ఆరోగ్య పరిస్థితులతో సంబంధం లేకుండా అందరికీ ఈ పొడిని ఉపయోగించే వీలుంటుంది. అత్యవసర సమయాల్లో దాతలు అందుబాటులో లేకపోయినా... నిల్వ చేసుకున్న ఈ పౌడర్‌ ప్లాస్మాను ఉపయోగించుకోవచ్చునని వైద్యులు చెబుతున్నారు. పౌడర్‌ని ఐదేళ్లపాటు వినియోగించుకునే వీలుంటుందంటున్నారు. ప్లాస్మా చికిత్సలో భాగంగా ఈ పౌడర్‌ను సెలైన్‌లో కలిపి శరీరంలోకి ఎక్కించవచ్చునని చెబుతున్నారు.
పొడి రూపంలో తయారుచేసిన ప్లాస్మాను త్వరలోనే ఐసీఎంఆర్కు అందజేయనున్నట్లు వైద్యనిపుణులు చెబుతున్నారు. అనుమతుల అనంతరం దీనిపై క్లినికల్‌ ట్రయల్స్‌ ప్రారంభిస్తామని వెల్లడిస్తున్నారు.
