Rahul tour Second day: రాష్ట్ర పర్యటనలో భాగంగా కాంగ్రెస్ అగ్రనేత రాహుల్ గాంధీ రెండో రోజు తీరిక లేకుండా గడుపుతున్నారు. ఉదయం 10 గంటలకు పలువురు మీడియా అధిపతులతో రాహుల్ సమావేశమయ్యారు. రాష్ట్రంలో కాంగ్రెస్ పార్టీ పరిస్థితిని మీడియాధిపతులను అడిగి తెలుసుకున్న రాహుల్.. పార్టీ బలోపేతానికి తీసుకోవాల్సిన చర్యలపై సలహాలు, సూచనలు స్వీకరించారు. అనంతరం తెలంగాణ ఉద్యమకారులతో సమావేశమయ్యారు. ఈ సమావేశానికి ప్రజా గాయకుడు గద్దర్, హరగోపాల్, కంచె ఐలయ్య హాజరయ్యారు. రాష్ట్రంలో రాజకీయ పరిస్థితులు, ప్రజలు ఎదుర్కొంటున్న సమస్యలను అడిగి తెలుసుకున్నారు. దశాబ్దాల కలను సాకారం చేసిన కాంగ్రెస్ పార్టీని తెలంగాణ ప్రజలు ఎందుకు ఆదరించడంలేదని ఉద్యమ నేతలను రాహుల్ అడిగినట్లు తెలుస్తోంది.
అనంతరం తాజ్ కృష్ణ హోటల్ నుంచి సంజీవయ్య పార్కుకు వెళ్లి మాజీ ముఖ్యమంత్రి దామోదరం సంజీవయ్య సమాధి వద్ద నివాళులు అర్పించారు. పార్కులో ఏర్పాటు చేసిన శిభిరంలో కాంగ్రెస్ నేతలతో కాసేపు కూర్చున్నారు. ఈ నేపథ్యంలో పార్కు వద్దకు భారీగా కాంగ్రెస్ శ్రేణులు చేరుకున్నాయి. పార్కులోకి వెళ్లేందుకు కార్యక్రర్తలు ప్రయత్నించగా పోలీసులు అడ్డుకున్నారు. ఈ క్రమంలో ఇరు వర్గాల మధ్య వాగ్వాదం చోటుచేసుకుంది.
అక్కడి నుంచి చంచల్ గూడ జైలుకు వెళ్లిన రాహుల్.. రిమాండ్లో ఉన్న ఎన్ఎస్యూఐ కార్యకర్తలతో ములాఖాత్ అయ్యారు. రాహుల్తో పాటు సీఎల్పీ నేత భట్టి విక్రమార్క ములాఖాత్లో పాల్గొన్నారు. జైల్లో రిమాండ్లో ఉన్న బల్మూరి వెంకట్తో పాటు మరికొందరు కార్యకర్తలతో మాట్లాడిన రాహుల్.. వారికి ధైర్యం చెప్పారు. అధైర్యపడకుండా కేంద్ర, రాష్ట్ర ప్రభుత్వాల ప్రజా వ్యతిరేక విధానాలపై పోరాటం చేయాలని సూచించారు. కష్టపడి పనిచేస్తుంటే పార్టీ అండగా ఉంటుందని భరోసా వారికి కల్పించారు.
చంచల్గూడ జైలులో ములాఖాత్ ముగిశాక.. రాహుల్గాంధీ నేరుగా గాంధీ భవన్కు చేరుకున్నారు. పార్టీ నేతలతో విస్తృత స్థాయి సమావేశంలో పాల్గొన్నారు. ఈ సమావేశంలో రాష్ట్రంలో నెలకొన్న తాజా రాజకీయ పరిస్థితులు, పార్టీ బలోపేతంపై చర్చించి నాయకులకు దిశానిర్దేశం చేయనున్నారు. అనంతరం సభ్యత్వ నమోదు సమన్వయకర్తలను రాహుల్ గాంధీకి టీపీసీసీ అధ్యక్షుడు రేవంత్ రెడ్డి పరిచయం చేస్తారు. ఫొటో సెషన్లో పాల్గొన్న తర్వాత.. రెండు రోజుల పర్యటనను ముగించుకుని రాహుల్ దిల్లీ బయల్దేరి వెళ్తారు.
ఇవీ చూడండి:
