దేశంలో మహిళల రక్షణకు కేంద్ర సర్కార్తో పాటు అన్ని రాష్ట్రాల ప్రభుత్వాలు చర్యలు తీసుకుంటున్నాయని జాతీయ మహిళా కమిషన్ సభ్యురాలు రాజుల్బెన్ దేశాయ్ అన్నారు. తెలంగాణలో మహిళలపై జరుగుతున్న ఆకృత్యాల విషయాల్లో పోలీసులు తీసుకుంటున్న చర్యల గురించి డీజీపీ మహేందర్ రెడ్డి నుంచి తెలుసుకున్నట్లు చెప్పారు. ఎక్కువగా గృహహింస, వరకట్న వేధింపులకు సంబంధించిన కేసులు తమ వద్దకు వస్తున్నట్లు వెల్లడించారు.బాధితులకు ఆశ్రయం కల్పించడానికి కేంద్ర ప్రభుత్వం ప్రత్యేకంగా సఖి కేంద్రాలను ఏర్పాటు చేసిందన్నారు.
తెలంగాణ ప్రభుత్వం తరఫున షీ టీమ్స్, భరోసా కేంద్రాల పనితీరు బాగుందని రాజుల్బెన్ కితాబిచ్చారు. రాష్ట్రంలోని యూనివర్సిటీల్లో విద్యార్థినిలపై జరుగుతున్న అఘాయిత్యాలను అరికట్టేందుకు వారికి శిక్షణ, అవగాహన కార్యక్రమాలు నిర్వహిస్తున్నట్లు తెలిపారు. గ్రామీణ ప్రాంతాల్లో అమ్మాయిలపై జరుగుతున్న అరాచకాలు వెలుగులోకి తీసుకురావాలని, అన్ని రకాల చర్యలు తీసుకున్నా ఆడవాళ్లపై ఆకృత్యాలు ఆగడం లేదని ఆమె ఆవేదన వ్యక్తం చేశారు. మహిళలు అమ్మాయిలు వరకట్నం, లైంగిక వేధింపులు వంటి విషయాల్లో మహిళా కమిషన్ను సంప్రదించాలని కోరారు. ఇప్పటివరకు 2019లో 52 కేసులు, 2020లో 124 కేసులు , 2021లో పది కేసుల వరకూ పెండింగ్లో ఉన్నాయని వెంటనే వాటిని పరిష్కరించేందుకు కృషి చేస్తామని పేర్కొన్నారు.
- ఇదీ చూడండి : ఆకతాయిల చిట్టా సిద్ధం.. రెండోసారి చిక్కితే అంతే ఇక!
