పట్వారీ, వీఆర్వో వ్యవస్థలు ఏళ్లతరబడి కొనసాగించిన తప్పులు.. భూ యజమానులకు శాపంగా మారాయి. భూదస్త్రాల ప్రక్షాళనకు (ఎల్‌ఆర్‌యూపీ) ప్రభుత్వం 2017లో బృహత్తర కార్యక్రమాన్ని నిర్వహించింది. గ్రామస్థాయిలో సభలు ఏర్పాటుచేసి 1బి నకళ్లను రైతులకు ఇచ్చి దస్త్రాలను నవీకరించింది. సమయం లేకపోవడంతో సిబ్బంది ఎల్‌ఆర్‌యూపీ సమాచారంతో పాటు అప్పటి వరకు అమల్లో ఉన్న వెబ్‌ల్యాండ్‌ (2011-2014 మధ్య రూపొందించిన పహాణీ సమాచారం) సమాచారాన్ని ఎక్కించారు. అనంతరం అవగాహన ఉన్న రైతులు మాత్రమే తమ భూ రికార్డులను ఎప్పటికప్పుడు సరిచేయించుకున్నారు. చాలామంది రైతులది పాత సమాచారమే ఎల్‌ఆర్‌యూపీ సాఫ్ట్‌వేర్‌లోకి చేరింది. అక్కడి నుంచి ఎలాంటి మార్పులకు వీల్లేని టీఎస్‌ఐఎల్‌ఆర్‌ఎంఎస్‌ (ధరణి) పోర్టల్‌లోకి చేరింది.
నాటి సిబ్బంది తప్పిదమే కారణం
రాష్ట్రంలో 1936లో నిర్వహించిన సర్వే సమాచారం ఆధారంగా 2014 ముందు వరకు పహాణీలు, దస్త్రాలు చేతిరాతతో కొనసాగాయి. ఈ సందర్భంగా క్షేత్రస్థాయి సిబ్బంది ఎవరికి తోచినట్లు వారు విస్తీర్ణాలు, సర్వే నంబర్లు వేయడమే ఇప్పుడు సమస్యలకు కారణమైంది. తరాలు మారడంతో యజమానులు మారారు. సర్వే నంబర్ల పక్కన బై నంబర్లు వేసుకుంటూ వచ్చారు. సమాచారం అప్‌లోడ్‌ చేసే సమయంలో పోర్టల్ అనుమతించని కారణంగా సిబ్బంది చాలా సర్వే నంబర్లు, ఖాతాలను తొలగించారు.
సర్వేతోనే పరిష్కారం
దస్త్రాలు స్పష్టంగా ఉంటే క్షేత్ర స్థాయిలో భూపరిశీలన లేకుండానే తక్షణమే రిజిస్ట్రేషన్‌, భూయాజమాన్య హక్కు మార్పిడికి కొత్త చట్టం వీలు కల్పిస్తోంది. ధరణిలోని డిజిటల్‌ సమాచారానికి చట్టబద్ధత కల్పించారు. చేతిరాతతో కొనసాగిన భూదస్త్రాలు అనేక మార్పులకు గురైనందున క్షేత్రస్థాయిలో పరిశీలించకుండా హక్కుల కల్పన జరిగితే సమస్యలు వచ్చే అవకాశాలున్నాయని నిపుణులు సూచిస్తున్నారు. సమగ్ర భూసర్వే చేపట్టి కచ్చితమైన భూ సమాచారంతో దస్త్రాలు సిద్ధం చేస్తేనే సమస్యలు ఉండవని సూచిస్తున్నారు. ప్రభుత్వం కూడా సమగ్ర సర్వేకు సిద్ధంగా ఉండటంతో ఈ ప్రక్రియ ఎప్పుడు ప్రారంభమవుతుందోనన్న ఆశతో ప్రజలు ఎదురుచూస్తున్నారు.
ఇదీ చూడండి: "ధరణి" రూప కల్పనపై నేడు కేసీఆర్ కీలక సమీక్ష
