ఆంధ్రప్రదేశ్ ప్రభుత్వం ఫిర్యాదు చేసిన నీటిపారుదల ప్రాజెక్టుల సవివర ప్రాజెక్టు నివేదికలు ఇవ్వాలని కృష్ణానదీ యాజమాన్య బోర్డు తెలంగాణ ప్రభుత్వాన్ని కోరింది. ఏపీ ఫిర్యాదుపై స్పందించిన బోర్డు... ఈ మేరకు తెలంగాణ వివరణ కోరింది. కృష్ణానదీ యాజమాన్య బోర్డు ఛైర్మన్ అనుమతితో బోర్డు సభ్యుడు హరికేష్ మీనా తెలంగాణ నీటిపారుదలశాఖ ముఖ్యకార్యదర్శి రజత్ కుమార్కు లేఖ రాశారు.
అపెక్స్ కౌన్సిల్ అనుమతి లేకుండా విభజన చట్టంలోని అంశాలకు విరుద్ధంగా తెలంగాణ ప్రభుత్వం పాలమూరు - రంగారెడ్డి, డిండి, భక్తరామదాసు, తుమ్మిళ్ల ఎత్తిపోతల పథకాలతో పాటు మిషన్ భగీరథ పథకాలను చేపట్టిందని... కల్వకుర్తి, నెట్టెంపాడు, ఎస్సెల్బీసీ సామర్థ్యాన్ని కూడా పెంచాలని ఏపీ తన ఫిర్యాదులో పేర్కొంది.
గతంలో చేసిన ఫిర్యాదు ఆధారంగా ఈ విషయమై 2019 అక్టోబర్ 16వ తేదీ నాటి లేఖలో వివరాలు కోరినప్పటికీ తెలంగాణ ప్రభుత్వం స్పందించలేదని బోర్డు తెలిపింది. ఆంధ్రప్రదేశ్ ప్రభుత్వం తాజా ఫిర్యాదులో ప్రస్తావించిన ప్రాజెక్టుల సవివర నివేదికలు, వివరాలను అందించాలని కోరింది. ఈ అంశాన్ని ప్రాధాన్యకరంగా పరిగణించాలని సూచించింది.
