Komatireddy Venkat Reddy Comments: కాంగ్రెస్ పార్టీ ప్రచార కమిటీ ఛైర్మన్ కోమటిరెడ్డి వెంకట్రెడ్డికి.. రాష్ట్ర నాయకత్వానికి మధ్య కోల్డ్ వార్ కొనసాగుతోంది. తమ్ముడు రాజగోపాల్రెడ్డి రాజీనామాతో మారిన సమీకరణాలతో.. వెంకట్రెడ్డి కూడా అదే బాటలోనే నడుస్తాడేమోనన్న అనుమానంతో అధిష్ఠానం ఆయనను పక్కకుపెట్టినట్టు కనిపిస్తోంది. రేపు నారాయణపూర్ నుంచి చౌటుప్పల్ వరకు సాగనున్న పాదయాత్రకు పిలుపు రాకపోవటం.. మునుగోడు ఉపఎన్నికల మీటింగ్ గురించి సమాచారం లేకపోవటం ఆ అనుమానాలకు బలం చేకూరుస్తున్నాయి. అయితే.. పార్టీలో చోటుచేసుకుంటున్న పరిణామాలు.. తనను పట్టించుకోకపోవటం.. చండూరు సభలో తనకు జరిగిన అవమానంపై కోమటిరెడ్డి వెంకట్రెడ్డి పీకలదాకాా కోపంతో ఉన్నట్టు తెలుస్తోంది.
పార్టీని వీడి కాషాయ కండువా కప్పుకున్న దాసోజు శ్రవణ్ చేసిన "పార్టీలో ప్రాంఛైజీ రాజకీయం" ఆరోపణలను ఉటంకిస్తూ.. అధిష్ఠానంపై ఉన్న అక్కసును మీడియా ముందు వెళ్లగక్కారు. చండూరు సభలో జరిగిన అవమానాన్ని సీరియస్గా తీసుకున్న వెంకట్రెడ్డి.. నాయకత్వం నుంచి ఎలాంటి బుజ్జగింపు లేకపోవటాన్ని జీర్ణించుకోలేకపోతున్నట్టు కనిపిస్తోంది. సభల గురించి సమాచారం లేకపోవటం.. సభల్లో తిట్టినా పట్టించుకోకపోవటం.. తిట్టిన వారిపై చర్యలు తీసుకోకపోవటంపై అక్కస్సు వెళ్లగక్కుతున్న వెంకట్రెడ్డి.. ఈ పరిణామాలన్నింటి వెనుక పీసీసీ అధ్యక్షుడు రేవంత్రెడ్డి ఉన్నట్టు పరోక్షంగా ఆరోపిస్తున్నారు. అయితే.. వీళ్లిద్దరి మధ్య గతంలోనే బేధాభిప్రాయాలున్న నేపథ్యంలో.. ఇప్పుడు ఈ వరుస ఘటనలతో వారి మధ్య అంతర్గత వైరం మరింత ముదురుతున్నట్టు అభిమానులు చెవులు కొరుక్కుంటున్నారు.
పాదయాత్ర గురించి గాంధీభవన్ నుంచి తనకు ఎలాంటి పిలుపు రాలేదంటున్న కోమటిరెడ్డి.. పిలవని పేరంటానికి తాను వెళ్లనని తెగేసి చెబుతున్నారు. తనకు జరిగిన అవమానంపై సంబంధిత నాయకత్వం క్షమాపణలు చెబితేనే.. ప్రచారంలో పాల్గొనటంపై ఆలోచిస్తానంటున్నారు. పార్టీలో తనకు జరుగుతున్న అవమానాలపై నేరుగా దిల్లీ వెళ్లి రాహుల్గాంధీ వద్దనే తేల్చుకుంటానని చెబుతున్నారు.
"మునుగోడు ఉపఎన్నికల మీటింగ్ సమాచారం నాకు లేదు. పిలువని పేరంటానికి నేను వెళ్లను. మునుగోడు గురించి నాకు ఏం తెల్వదు. మేము కానిస్టేబుళ్లమని అవమానించారు. మమ్మల్ని అవనించిన వారు క్షమాపణ చెప్పాలి. ఐఎఎస్లు ఉన్నప్పుడు మాతో ఏం పని.. వాళ్లే గెలిపించుకుంటారు. రేపటి కాంగ్రెస్ పాదయాత్రకు కూడా నన్ను ఎవరూ పిలువలేదు. చండూరు సభలో ఓ కార్యకర్తతో నన్ను తిట్టించారు. అక్కడే అతన్ని లాగిపెట్టి కొట్టాల్సింది. నాలాంటి సీనియర్ను తిట్టిన అతన్ని పార్టీ నుంచి సస్పెండ్ చేయాలి. తిట్టించిన వాళ్లు క్షమాపణ చెప్పాలి. అప్పుడు మాత్రమే అక్కడ ప్రచారంపై ఆలోచన చేస్తా. దాసోజు శ్రవణ్ చెప్పినట్టు.. పార్టీలో ప్రాంఛైజీ నడుస్తోంది. ఈ విషయమై దిల్లీలో రాహుల్ గాంధీ దగ్గరనే తేల్చుకుంటా." - కోమటిరెడ్డి వెంకట్రెడ్డి
ఇవీ చూడండి:
