పేదల సంక్షేమం కోసం పథకాలు ప్రవేశపెట్టిన ఘనత కేసీఆర్కే దక్కుతుందని ఉపసభాపతి తీగుల్ల పద్మారావు గౌడ్ వ్యాఖ్యానించారు. సికింద్రాబాద్లోని పలు డివిజన్లలో కోటికిపైగా విలువ చేసే కల్యాణలక్ష్మి, షాదీ ముబారక్, సీఎమ్ఆర్ఎఫ్ చెక్కులను నామాలగుండులోని క్యాంపు కార్యాలయంలో లబ్ధిదారులకు పంపిణీ చేశారు. ముషీరాబాద్, మారేడుపల్లి రెవిన్యూ మండలాల పరిధిలోని సీతాఫల్మండీ, బౌద్ధనగర్, అడ్డగుట్ట, మెట్టుగూడ, తార్నాక డివిజన్లకు చెందిన 120 మందికి చెక్కులు అందజేశారు. ఆడపిల్లల పెళ్లిళ్లు తల్లిదండ్రులకు భారం కాకూడదనే ఉద్దేశంతో ఇలాంటి పథకాలను సీఎం ప్రవేశపెట్టారని తెలిపారు.
డబ్బులు ఇవ్వొద్దు:
లబ్ధిదారులు ఎవరికీ డబ్బులు ఇవ్వాల్సిన అవసరం లేదని ఆయన తెలిపారు. ఎవరైనా డబ్బులు డిమాండ్ చేస్తే తమ కార్యాలయం నంబర్లకు ఫోన్ చేయాలని పద్మారావు గౌడ్ సూచించారు. ఈ కార్యక్రమంలో తహసీల్దార్లు జానకి, సునీల్ కుమార్, తెరాస యువనేతలు కిశోర్ కుమార్ గౌడ్, తీగుల్ల రామేశ్వర్ గౌడ్, ఇతర నాయకులు, అధికారులు పాల్గొన్నారు.
ఇదీ చూడండి: 'గొలుసుకట్టు వ్యాపారంలో కోట్లు కట్టించి మోసపోయాం'
