జనసేన ఎమ్మెల్యే రాపాక వరప్రసాద్ సంచలన వ్యాఖ్యలు చేశారు. జనసేనలో గెలిచినా వైకాపాతో తన ప్రయాణం కొనసాగుతుందని స్పష్టం చేశారు. వైకాపాలో టికెట్టు కోసం ప్రయత్నించినా... చివరి నిమిషంలో వేరొకరికి వెళ్లిందన్నారు. జగన్, వైవీ సుబ్బారెడ్డితో టికెట్టు కోసం చర్చలు కూడా జరిగాయని ఆయన అన్నారు. కానీ తప్పనిసరై నాగేశ్వరరావుకు టికెట్టు ఇచ్చారన్నారు. ఖాళీగా ఉన్న తనను జనసేన ఆహ్వానించిందన్నారు. రాజోలు నియోజకవర్గంలో కాపులు ఓటింగ్ ఎక్కువ కనుక విజయం సాధించవచ్చు అని ఆ పార్టీలోకి వెళ్లానని రాపాక అన్నారు. తూర్పుగోదావరి జిల్లా గూడపల్లి పల్లి పాలెం జరిగిన ఓ కార్యక్రమంలో పాల్గొన్న ఆయన ఈ వ్యాఖ్యలు చేశారు.
'గెలిచిన తర్వాత ఏపీ సీఎం జగన్ను కలిశాను. నీకు టికెట్టు ఇవ్వాలన్నా.. ఇవ్వలేకపోయామని జగన్ అన్నారు. సరే ఎలాగో గెలిచావు, కలిసి పనిచేద్దామని ఆయన కోరారు. ఆ రోజు నుంచి వైకాపాతో కలిసి పనిచేస్తున్నాను. నేను గెలిచిన పార్టీ(జనసేన) ఉండేది కాదు. నాకు బలగం ఉంది కాబట్టి గెలిచాను. మిగిలిన చోట్ల ఎక్కడా ఆ పార్టీ గెలవలేదు కదా. ఆ పార్టీ అధ్యక్షుడే గెలవలేకపోయాడు.
గెలిచినప్పటి నుంచి వైకాపా నుంచే నా ప్రయాణం. నియోజకవర్గంలో వర్గాలున్నాయి. వైకాపాలో ఉన్న వర్గాలను నేను పట్టించుకోవటం లేదు. పేచీకి వెళ్లే ఉద్దేశం నాకు లేదు. కలిసే వెళ్తున్నాను. వాళ్లు కలిస్తే కలుస్తారు లేకపోతే లేదు. అది పార్టీకి మంచిది కాదు. కలుస్తానన్న వాడిని కలుపుకోవాలి. తెలుగు దేశం వాళ్లు ఏం ఇచ్చిన కలవరు. నేను కాంగ్రెస్ పార్టీ వాడిని టికెట్ రాకపోవడం వల్లే ఇతర పార్టీకి వెళ్లాను. ఈ వర్గ రాజకీయాలు పోవాలంటే సీఎం ఒక నిర్ణయం తీసుకోవాలి. ఎవరికో ఒకరికి బాధ్యత అప్పగించాలి. తొందరలోనే ఆ సమస్య కూడా పరిష్కారం అవుతుందని" ఎమ్మెల్యే రాపాక వరప్రసాద్ అన్నారు.
ఇవీచూడండి: పరిస్థితి ఇలాగే ఉంటే.. పోరాటం చేయక తప్పదు: జగ్గారెడ్డి
