పోలీసుల ప్రొటోకాల్​.. ట్రాఫిక్​ డ్యూటీలో డాక్టర్​.. హోంమంత్రి ఫైర్​..!

ప్రొటోకాల్​ కోసం పోలీసులు ట్రాఫిక్​ను కాసేపు ఆపేస్తే.. వైద్యులు ఆ ట్రాఫిక్​ను నియంత్రించిన ఘటన హైదరాబాద్​లో చోటుచేసుకుంది. ఈ ఘటన కాస్తా... హోం మంత్రి మహమూద్​ అలీ దృష్టికి చేరటంతో పోలీసులపై తీవ్ర ఆగ్రహం వ్యక్తం చేశారు. పోలీసులపై హోంమంత్రి ఎందుకు ఆగ్రహం వ్యక్తం చేశారంటే...?

హైదరాబాద్‌ మాసబ్‌ట్యాంక్‌ ట్రాఫిక్‌ పోలీసులపై హోం మంత్రి మహమూద్‌ అలీ తీవ్ర ఆగ్రహం వ్యక్తం చేశారు. వాళ్లు చేసిన పనిని తెలుసుకుని.. అసహనం వ్యక్తం చేశారు. ఇలా ఎలా చేస్తారని ప్రశ్నించారు. హైదరాబాద్ పాతబస్తీ చాంద్రాయణ​గుట్ట బండ్లగూడ ప్రాంతంలో నూతనంగా నిర్మించిన పోలీస్​స్టేషన్​ భవనాన్ని ప్రారంభించేందుకు హోంమంత్రి సహా.. డీజీపీ మహేందర్​రెడ్డి తదితరులు హాజరయ్యారు. కార్యక్రమానికి వెళ్లే క్రమంలో... ప్రొటోకాల్​ కోసం మాసబ్​ట్యాంక్​ ప్రాంతంలో ట్రాఫిక్​ను​ పోలీసులు కాసేపు నిలిపేశారు. ఫ్లైఓవర్​ దగ్గరున్న సిగ్నల్​ దగ్గర వాహనాలను ఆపేయటం వల్ల భారీగా ట్రాఫిక్ జామ్​ అయ్యింది.

ట్రాఫిక్​ను నియంత్రించిన వైద్యులు...

అదే సమయంలో అత్యవసర రోగులున్న రెండు అంబులెన్సులు ట్రాఫిక్​లో చిక్కుకున్నాయి. అంబులెన్స్​ సైరన్​ వినిపించినప్పటికీ... ట్రాఫిక్​ మధ్యలో ఇరుక్కుపోయేసరికి పోలీసులు ఏమీ చేయలేని పరిస్థితిలో ఉండిపోయారు. లోపలున్న బాధితుని పరిస్థితి సీరియస్​గా ఉండటంతో... అందులో ఉన్న వైద్యులు బయటికి వచ్చి పోలీసులకు విషయం వివరించారు. ఓ వైపు ప్రొటోకాల్​... మరోవైపు ట్రాఫిక్​... ఇలాంటి పరిస్థితిలో అంబులెన్సులను ఎలా బయటికి తీసుకొస్తామనుకున్నారో ఏమో పోలీసులు.. కాసేపు ఆగాలని సూచించారు. పోలీసుల నిర్లక్ష్యంపై అసహనం వ్యక్తం చేసిన వైద్యులు... వాళ్లే స్వయంగా ట్రాఫిక్​ను నియంత్రించారు. వాళ్లకు మిగతా వాహనదారులు కూడా తోడవటంతో... ట్రాఫిక్​ నుంచి అంబులెన్సులు బయటపడ్డాయి. ఈ విషయంలో ట్రాఫిక్​ పోలీసుల తీరుపై అందరూ ఆగ్రహం వ్యక్తం చేశారు. వాహనదారులకే సూచనలివ్వాల్సిన పోలీసులు... వాళ్ల ప్రొటోకాల్​ కోసం ఇలా నిబంధనలకు విరుద్ధంగా... ఏమాత్రం మానవత్వం లేకుండా వ్యవహరించారని మండిపడ్డారు.

ఈ విషయం కాస్తా... హోం మంత్రి మహమూద్​ అలీ దృష్టికి చేరటంతో పోలీసుల చర్యపై తీవ్రంగా మండిపడ్డారు. అంబులెన్స్‌ ఘటనపై ఆరా తీశారు. ఘటనపై హైదరాబాద్‌ సీపీ అంజనీకుమార్‌ హోంమంత్రికి వివరణ ఇచ్చారు. ఇలాంటి ఘటనలు పునరావృతం కాకుండా చూస్తామని సీపీ అంజనీకుమార్‌ తెలిపారు.

నూతన పోలీస్​స్టేషన్​ భవన ప్రారంభోత్సవం..

చంద్రయాన్​గుట్టలోని బండ్లగూడ ప్రాంతంలో 4 కోట్ల 21 లక్షలతో కొత్తగా నిర్మించిన పోలీస్​స్టేషన్ భవనాన్ని హోం మంత్రి ప్రారంభించారు. ఈ కార్యక్రమంలో హైదరాబాద్ ఎంపీ అసదుద్దీన్ ఓవైసీ, రాష్ట్ర డీజీపీ మహేందర్ రెడ్డి, ఎమ్మెల్సీ సురభి వాణీ దేవి, ఎమ్మెల్సీ సయ్యద్ అమినుల్ హసన్ జాఫ్రీ, హైదరాబాద్ నగర సీపీ అంజనీ కుమార్, తదితర ఉన్నత పోలీస్​ అధికారులు, కౌన్సిలర్లు తదితరులు పాల్గొన్నారు.

ఇవీ చూడండి: