గ్రామాల్లోనే ధాన్యం కొనుగోలు కేంద్రాలు : మంత్రి నిరంజన్​ రెడ్డి

బత్తాయి, నిమ్మ రైతులతో పాటు మామిడి రైతుల ఇబ్బందులు వీలైనంతగా తగ్గించేందుకు అవసరమైన చర్యలు తీసుకుంటామని వ్యవసాయశాఖ మంత్రి సింగిరెడ్డి నిరంజన్ రెడ్డి తెలిపారు. కరోనా, లాక్ డౌన్ నేపథ్యంలో రైతులు నష్టపోకుండా తగిన ఏర్పాట్లు చేస్తున్నట్లు ఆయన చెప్పారు. గ్రామాల్లోనే కొనుగోలు కేంద్రాలు ఏర్పాటు చేసి ధాన్యం సహా వ్యవసాయ ఉత్పత్తుల కొనుగోలు చేస్తామని అన్నారు. కూరగాయల విక్రయానికి హైదరాబాద్​లో సంచార రైతుబజార్లు ఏర్పాటు చేసినట్లు తెలిపారు. రాష్ట్ర రైతులకు ఉన్న సమస్యలు కేంద్రం దృష్టికి తీసుకెళ్లామని ఈటీవీ భారత్​ ముఖాముఖిలో వెల్లడించారు.

వ్యవసాయ రంగంపై లాక్​డౌన్​ ప్రభావం ఎలా ఉంది?

లాక్​డౌన్​ విధించే ముందు కొన్ని మార్గదర్శకాలు రూపొందించాం. ప్రజలకు ఆహార కొరత రాకుండా, పంట అమ్ముకునేందుకు రైతులు ఇబ్బంది పడకుండా ప్రణాళికలు రూపొందించాం. మార్కెట్లు పెట్టుకోవడానికి రైతులకు అనుమతులు ఇచ్చాం. ఎక్కువ లారీలు వచ్చి గుమిగూడితే కరోనా వ్యాప్తి చెందే అవకాశం ఉంది కాబట్టి వ్యవసాయ మార్కెట్లను వికేంద్రీకరించాం. వినియోగదారులకు ఇబ్బంది రాకుండా సంచార మార్కెట్లను అందుబాటులోకి తీసుకువచ్చాం.

ఈసారి రికార్డు స్థాయిలో వరి ధాన్యం పండింది. కొనుగోలు సంబంధించి రైతులకు ఇబ్బంది లేకుండా ఎలాంటి జాగ్రత్తలు తీసుకుంటున్నారు?

గ్రామాల్లోనే పంట కొనుగోలు కేంద్రాలు ఏర్పాటు చేశాం. కొనుగోలు కేంద్రాల వద్ద రద్దీ ఉండకుండా రైతులకు కూపన్లు ఇస్తున్నాం. శానిటైజేషన్​ చేస్తున్నాం. రైతులు భౌతిక దూరం పాటించేలా జాగ్రత్తలు తీసుకుంటున్నాం.

పండ్ల పంటలు కోసే అవకాశం లేదు. లాక్​డౌన్​ నేపథ్యంలో ఎగుమతి చేసే అవకాశం లేదు. దీనికి సంబంధించి ఎలాంటి చర్యలు తీసుకుంటున్నారు?

బత్తాయి, నిమ్మ లాంటి పండ్లను తెంపడానికి యంత్రాలు ఉండవు. కచ్చితంగా మనుషులే తెంపాలి. వ్యయసాయ పనులకు లాక్​డౌన్​ నుంచి మినహాయింపు ఇచ్చినప్పటికీ కరోనా నేపథ్యంలో కూలీలు భయపడుతున్నారు. వాళ్ల ఆందోళన న్యాయబద్ధమైనదే. పంటను రైతు కుటుంబమే కోసినా... ఆ పంటలకు మన రాష్ట్రంలో డిమాండ్ తక్కువ. ఇప్పుడున్న పరిస్థితుల్లో ఎగుమతి చేయలేం. ఈ ప్రత్యేకమైన పరిస్థితుల్లో ప్రభుత్వాలు కూడా ఏం చేయలేవు.

ఆ పంటను రాష్ట్ర ప్రభుత్వమే తీసుకుని పంపిణీ చేసే అవకాశం ఏమైనా ఉందా?

ఆ విధంగా కూడా ఆలోచించాము. ఆ పంట రవాణాకు ఎంతో మంది పని చేయాల్సి వస్తుంది. దీనివల్ల కరోనా వ్యాప్తి పెరిగే అవకాశం ఉంది.

మామిడి సీజన్​ కూడా ప్రారంభమైంది. ఈసారి పంట ఉత్పత్తి కొంత తగ్గింది. ఈ మామిడి రైతులకు ఏం చేయబోతున్నారు?

ఈసారి మామిడి ఉత్పత్తి 30 శాతం తక్కువగా ఉంది. నేను కూడా మామిడి రైతునే. ఉత్పత్తి తక్కువ ఉండటం వల్ల డిమాండ్ ఎక్కువై.. రైతుకు అధిక ధర లభించే అవకాశం ఉంది. దురదృష్టవశాత్తు కరోనా వచ్చింది. మన రాష్ట్రంలోనే మామిడికి డిమాండ్ ఎక్కువ. సమయం ఉంది కాబట్టి వీలైనంత వరకు మామిడి రైతులకు అసౌకర్యం లేకుండా చూస్తాం.

అకాల వర్షం వల్ల పంట నష్టం వాటిల్లింది. ప్రభుత్వం తరఫున రైతులకు ఎలా న్యాయం చేస్తారు?

వడగండ్ల వాన వల్ల రాష్ట్ర వ్యాప్తంగా ప్రాథమిక అంచనా ప్రకారం 15వేల ఎకరాల్లో పంట నష్టం వాటిల్లింది. ఇన్సూరెన్స్, జాతీయ విపత్తు కింద వారికి న్యాయం చేసే అవకాశాన్ని పరిశీలిస్తున్నాం. రాష్ట్ర విపత్తు నిర్వహణకు సీఎం కేసీఆర్​ ఛైర్మన్​గా ఉంటారు. ముఖ్యమంత్రి ఆదేశాల కోసం చూస్తున్నాం.

పంట కొనుగోలు కేంద్రాలపై అకాల వర్షాల ప్రభావం చూపకుండా ఎలాంటి చర్యలు తీసుకుంటున్నారు?

వాతావరణం ఎలా ఉందో రైతులు తెలుసుకొని పంటను మార్కెట్​కు తీసుకురావాలి. వర్షంపడే సూచనలు ఉంటే పంటను తీసుకురావద్దు. రాష్ట్ర వ్యాప్తంగా పంట కొనుగోలు కేంద్రాల వద్ద టార్ఫాలిన్ కవర్లు ఏర్పాటు చేశాం.

అన్ని రాష్ట్రాల వ్యవసాయ శాఖ మంత్రులతో కేంద్ర వ్యవసాయ శాఖ మంత్రి నిన్న వీడియో కాన్ఫరెన్స్​ నిర్వహించారు. రాష్ట్రానికి సంబంధించి ఏ విషయాన్ని చెప్పారు. ఎలాంటి సమయం కావాలని అడిగారు?

గన్ని సంచుల కొరత రాకుండా చూడాలని కోరాను. బత్తాయి రైతుల సమస్యలను విన్నవించాను. హైదరాబాద్​లో సంచార మార్కెట్ల ద్వారా కూరగాయలు విక్రయిస్తున్న తీరును వివరించాను. ఐడియా బాగుందని అన్నారు. కరోనా కట్టడికి రాష్ట్ర ప్రభుత్వం మంచి చర్యలు తీసుకుంటోందని కేంద్రమంత్రి ప్రశంసించారు. విత్తనాల సరఫరాకు అంతరాయం కలగకుండా చర్యలు తీసుకోవాలని కోరాను.

లాక్​డౌన్​ ఎత్తివేసినా దీని ప్రభావం చాలా రోజులు ఉంటుంది. త్వరలో ఖరీఫ్​ సీజన్​ ప్రారంభం అవుతుంది. రైతులు వ్యవసాయం చేసేందుకు సన్నద్ధమవుతారు. ఇలాంటి పరిస్థితుల్లో ఎలాంటి ముందస్తు కార్యాచరణ ప్రణాళిక రూపొందిస్తున్నారు?

విత్తనాలు, ఎరువుల కొరత లేకుండా ఆ మేరకు నిల్వలు సిద్ధం చేసుకున్నాం. రైతు బంధుకు ఇబ్బంది లేకుండా ఇప్పటికే బడ్జెట్​లో కేటాయింపులు చేశాం. విద్యుత్ సమస్య కూడా ఉండదు. కూలీల సమస్య మాత్రమే ఉంటుంది. ఉపాధి హామీ పథకాన్ని వ్యవసాయానికి అనుసంధానం చేస్తే తప్ప.. ఈ వ్యవసాయ రంగంలో కూలీల సమస్య తీరదు.

ఇదీ చూడండి: పారిపోయిన ప్రేమజంట- లాక్​డౌన్ రూల్స్​కు బుక్కైందంట!