ఎప్పుడూ పుడమి తల్లి ఒడిలో ఉంటూ సేద్యం చేసుకునే ఓ రైతుకు అదృష్టం కలిసొచ్చి ఒక్క రోజులోనే కోటీశ్వరుడయ్యారు. ఏపీలోని కర్నూలు జిల్లా తుగ్గలి మండలం చిన్న జొన్నగిరిలో గురువారం ఓ రైతు పొలానికి వెళ్లగా.. మిలమిలా మెరుస్తున్న రాయి ఆకర్షించింది. వజ్రంగా భావించి ఇంటికి తీసుకువచ్చాడు. స్థానిక వ్యాపారికి చూపించగా రూ.1.2 కోట్లు వెచ్చించి కొనుగోలు చేసినట్లు తెలిసింది.
30 క్యారెట్ల బరువున్న ఈ వజ్రం మార్కెట్‌ ధర రూ.2 కోట్ల వరకు ఉంటుందని ఈ విషయం బయటకు పొక్కిన తర్వాత ఇతర వ్యాపారులు చెబుతున్నారు. అంత సొమ్ము ఒక్కసారి చూసిన అన్నదాత.. దక్కిందే అదృష్టంగా భావించి ఇతరులకు తెలియజేయలేదని, వ్యాపారి సైతం గుట్టుగా ఉంచే ప్రయత్నం చేసినట్లు తెలుస్తోంది.
