'వరద బాధితుల ఆర్థిక సాయంలో దళారుల జోక్యం తగదు'

సికింద్రాబాద్​లో వరద బాధితులకు ఆర్థిక సాయం అందజేతపై ఉపసభాపతి పద్మారావుగౌడ్​ సమీక్ష నిర్వహించారు. రూ.పది వేలు ఆర్థిక సాయంలో దళారీలు జోక్యం చేసుకుంటే వారిపై చట్టపరంగా చర్యలు తీసుకుంటామని ఆయన హెచ్చరించారు.

ప్రభుత్వం వరద బాధితులకు అందించే రూ.పది వేల ఆర్థిక సాాయంలో దళారీలు జోక్యం చేసుకుంటే వెంటనే క్రిమినల్​ కేసులు నమోదు చేస్తామని.. చట్టపరంగా చర్యలు తీసుకుంటామని ఉపసభాపతి పద్మారావుగౌడ్​ హెచ్చరించారు. సికింద్రాబాద్​ పరిధిలో రెండో విడత ఆర్థిక సాయం పంపిణీపై అధికారులు, నేతలతో సమీక్షించారు. అర్హులైన ప్రతి కుటుంబానికి రూ.పది వేల చొప్పున ఆర్థిక సాాయాన్ని అందించాలని సీఎం కేసీఆర్​ ఆదేశించారని తెలిపారు.

సికింద్రాబాద్​ నియోజకవర్గ పరిధిలోని అడ్డగుట్ట, తార్నాక, మెట్టుగూడ, సీతాఫల్​మండీ, బౌద్ధనగర్​ డివిజన్​లో రెండో విడతలో అర్హత కలిగిన కుటుంబాలకు సాయం అందించేందుకు ఏర్పాట్లు చేశామని పద్మారావుగౌడ్​ తెలిపారు. దళారీల ప్రమేయాన్ని తీవ్రంగా పరిగణిస్తామని ఆయన స్పష్టం చేశారు. ఎవరైనా దళారీలు, తాము డబ్బులు ఇప్పిస్తామని నమ్మిస్తే వెంటనే నామాలగుండులోని తమ క్యాంపు కార్యాలయాన్ని 040-27504448 నంబర్ ద్వారా సంప్రదించాలని లేదా పోలీసులకు ఫిర్యాదు చేయాలని సూచించారు.

ఇదీ చదవండిః ధరణిపై హైకోర్టు కీలక ఆదేశాలు... నమోదుపై మధ్యంతర ఉత్తర్వులు