1848 ఫిబ్రవరి 21న కారల్ మార్క్స్, ఎంగెల్స్ రచించిన కమ్యూనిస్ట్ మానిఫెస్టో విడుదలైంది. నేటికి 172 సంవత్సరాలు పూర్తి చేసుకున్న సందర్భంగా దిల్లీలోని అజోయ్ భవన్లో కమ్యూనిస్టుల ఆధ్వర్యంలో ఆవిర్భావ దినోత్సవ వేడుకలు నిర్వహించారు. సీపీఐ జాతీయ కార్యదర్శి నారాయణ, సీపీఎం పొలిట్బ్యూరో సభ్యులు రాఘవులు ఈ కార్యక్రమానికి హాజరయ్యారు.
48 పేజీల కమ్యూనిస్ట్ మానిఫెస్టో విడుదలైనప్పడే.. బూర్జువా వర్గం గుర్తించి దానికి వ్యతిరేకంగా కుట్రపన్నారని ఆయన అన్నారు. ఈ పుస్తకం విడుదలకు ముందే సామాజికవేత్తలు సమాజం ఎదుర్కొంటున్న సవాళ్లను, పేదరికాన్ని గుర్తించినప్పటికీ... దానికి పరిష్కారమార్గం కనిపెట్టలేదన్నారు. సమాజమార్పునకు తయారు చేసిన ఆయుధమే ఈ 'కమ్యూనిస్ట్ మానిఫెస్టో' అని నారాయణ అన్నారు.
172 వసంతాలు పూర్తి చేసుకున్నప్పటికీ ఈ పుస్తకానికున్న ప్రాసంగికత ఏ మాత్రం తగ్గలేదని సీపీఎం పొలిట్బ్యూరో సభ్యులు బీవీ రాఘవులు అన్నారు. మనచుట్టూ ఉన్న విషయాలనే ఈ గ్రంథం వివరిస్తుందని ఆయన తెలిపారు. ఈ సందర్భంగా మానిఫెస్టో తెలుగు అనువాద పుస్తకాన్ని ఆవిష్కరించారు.
ఇవీ చూడండి: రాజన్నకు పట్టువస్త్రాలు సమర్పించిన మంత్రి
