Mallu Ravi Fire on Komatireddy Rajagopal Reddy: ఎమ్మెల్యే పదవికి, కాంగ్రెస్ సభ్యత్వానికి కోమటిరెడ్డి రాజగోపాల్రెడ్డి రాజీనామా చేయటంపై టీపీసీసీ సీనియర్ ఉపాధ్యక్షుడు మల్లు రవి తీవ్రస్థాయిలో మండిపడ్డారు. రాజకీయ జన్మనిచ్చిన కాంగ్రెస్‌కు కోమటిరెడ్డి రాజగోపాల్ రెడ్డి వెన్నుపోటు పొడిచారని దుయ్యబట్టారు. కాంగ్రెస్ పార్టీ ఆయనకు ఎంపీ, ఎమ్మెల్సీ, ఎమ్మెల్యేగా అవకాశం కల్పించిందని తెలిపారు. కాంగ్రెస్లోనే ఉంటూ మూడేళ్లుగా భాజపా బ్రాండ్ అంబాసిడర్‌గా పనిచేశాడని ధ్వజమెత్తారు. ఆయన మాటలకు కాంగ్రెస్ శ్రేణులు సమాధానం చెబుతాయని మల్లు రవి పేర్కొన్నారు.
రేవంత్ రెడ్డి పీసీసీ అయ్యాక దళిత, గిరిజన ఆత్మగౌరవ సభలు, నిరుద్యోగ జంగ్‌ సైరన్లు చేశారని.. వరంగల్ రైతు సంఘర్షణ సభకు రాహుల్ గాంధీ వచ్చారని మల్లు రవి వివరించారు. త్వరలో సిరిసిల్లలో యూత్ డిక్లరేషన్ విడుదల చేయాలని చూస్తున్నామని మల్లురవి వెల్లడించారు. ఇందిరాగాంధీ హయాంలో జనతా పార్టీలో చేరిన వారంతా శంకరగిరి మాన్యాల్లో కలిసి పోయారన్నారు. ఇప్పుడు కాంగ్రెస్ వదిలిపెట్టి భాజపాలోకి వెళ్తున్న వారికి కూడా అదే గతి పడుతుందని మల్లురవి జోస్యం చెప్పారు.
"రాజకీయ జన్మనిచ్చిన కాంగ్రెస్‌కు కోమటిరెడ్డి రాజగోపాల్ రెడ్డి వెన్నుపోటు పొడిచారు. కాంగ్రెస్ పార్టీ ఆయనకు ఎంపీ, ఎమ్మెల్సీ, ఎమ్మెల్యేగా అవకాశం కల్పించింది. ఓవైపు తల్లిలాంటి సోనియాగాంధీపై ఈడీ దాడులు జరుగుతుంటే.. అదే రోజు అమిత్షాతో సమావేశమై కాంట్రాక్టుల గురించి.. పార్టీలో చేరటంపై చర్చలు చేశారు. ఇన్నిరోజులు పార్టీలోనే ఉంటూ.. వ్యతిరేకంగా మాట్లాడితే అంతర్గత వ్యవహారంగా తీసుకున్నాం. ఇప్పుడు పార్టీని వదిలిపెట్టారు కాబట్టి.. మాట్లాడే అర్హత కోల్పోయారు. ఇప్పటినుంచైనా మాట్లాడేటప్పుడు జాగ్రత్తగా మాట్లాడాలని హెచ్చరిస్తున్నాం. ఇన్ని రోజులు ఉన్నది కాంగ్రెస్లోనే అన్న విషయాన్ని గుర్తుపెట్టుకుని మాట్లాడాలి." - మల్లు రవి, టీపీసీసీ సీనియర్ ఉపాధ్యక్షులు
ఇవీ చూడండి:
