హైదరాబాద్ పాతబస్తీలో ఉన్న రోహింగ్యాలను గుర్తించడంలో తెరాస ప్రభుత్వం విఫలమైందని భాజపా రాష్ట్ర అధ్యక్షుడు బండి సంజయ్ ఆరోపించారు. నగరంలో అక్రమంగా ఉంటున్న వారిని ప్రభుత్వం గుర్తించాలని బండి సంజయ్ డిమాండ్ చేశారు. పాతబస్తీని పోలీసులకు 15 నిమిషాలు అప్పజెప్పితే... సంఘవిద్రోహ శక్తులను వెలికితీస్తారని... ఆ దమ్ము సీఎం కేసీఆర్కు ఉందా అని సవాల్ విసిరారు. పోలీసులకు స్వేచ్ఛ ఇస్తే సంఘవిద్రోహక శక్తులను అరెస్టు చేస్తారని హితవు పలికారు.
భాజపా రాష్ట్ర కార్యాలయంలో ఖమ్మం జిల్లాకు తెరాసకు చెందిన సాబాసు శ్రీనివాస్, రవీందర్, సత్యనారాయణ... సంజయ్ సమక్షంలో భాజపాలో చేరారు. ఖమ్మం, వరంగల్‌, సిద్దిపేట కార్పోరేషన్ ఎన్నికల వేళ తెరాస నేతలు భాజపాలో చేరేందుకు సిద్దంగా ఉన్నారని ఆయన స్పష్టం చేశారు. కొత్తగూడెం జిల్లాలో ఐదుగురు గిరిజన మైనర్ బాలికలపై ఉపాధ్యాయుడు ఐదు నెలలుగా లైంగిక వేధింపులకు పాల్పడ్డాడని...పోలీసులు చర్యలు తీసుకోకుండా తెరాస నేతలు ఒత్తిడి తీసుకువస్తున్నారని విమర్శించారు. దీనిపై సీఎం వెంటనే స్పందించాలని డిమాండ్ చేశారు.
త్వరలో రాష్ట్ర వ్యాప్తంగా బస్సు యాత్ర నిర్వహించేందుకు సన్నాహాలు జరుగుతున్నాయని భాజపా రాష్ట్ర అధ్యక్షుడు బండి సంజయ్ వెల్లడించారు. ఆ తర్వాత పాదయాత్ర చేయనున్నట్లు ఆయన ప్రకటించారు. రేపట్నుంచి రైతుల ఖాతాల్లో పీఎం కిసాన్‌ నిధులు జమ అవుతాయని ప్రకటించారు. కొత్త సాగు చట్టాల విషయంలో రైతులను కొన్ని పార్టీలు మోసం చేస్తున్నాయని బండి సంజయ్ ఆరోపించారు.
