Rupee value falling: రూపాయి విలువ పతనం కొనసాగుతోంది. బుధవారం కాస్త కోలుకున్న రూపాయి.. గురువారం ఇంట్రాడేలో 13 పైసలు బలహీన పడింది. దీంతో జీవితకాల కనిష్ఠ స్థాయిని నమోదు చేసింది. గురువారం ట్రేడింగ్లో అమెరికన్ డాలరుతో పోలిస్తే రుపాయి మారకం విలువ 77.74 వద్ద ప్రారంభమైంది. అనంతరం మరింత బలహీనపడి 77.81కి పడిపోయింది. తద్వారా బుధవారం సెషన్ క్లోజింగ్ స్థాయితో పోలిస్తే 13 పైసలు కోల్పోయింది.
కాగా, బుధవారం రుపాయి విలువ 10 పైసలు బలపడంది. అంతకుముందు రికార్డు స్థాయి కనిష్ఠం నుంచి కోలుకొని బుధవారం 77.68కి ఎగబాకింది.
మరోవైపు, బ్రెంట్ క్రూడ్ ఆయిల్ ధరలు 0.12 డాలర్లు పడిపోయాయి. ప్రస్తుతం బ్యారెల్ ముడి చమురు ధర రూ.123.43గా ఉంది. ఇదిలా ఉంటే డాలర్ ఇండెక్స్ కాస్త పుంజుకొని 102.55 వద్ద కొనసాగుతోంది.
కాగా, దేశీయ స్టాక్ మార్కెట్లు ఫ్లాట్గా ట్రేడవుతున్నాయి. 270 పాయింట్ల నష్టంతో ప్రారంభమైన బాంబే స్టాక్ ఎక్స్ఛేంజీ సూచీ సెన్సెక్స్.. ప్రస్తుతం 28 పాయింట్ల లాభంతో 54,920 వద్ద ట్రేడవుతోంది. సెన్సెక్స్ 30 షేర్లలో టాటాస్టీల్, ఎస్బీఐ, ఏషియాపేంట్స్, అల్ట్రాటెక్ సిమెంట్ నష్టాల్లో ఉన్నాయి. డాక్టర్ రెడ్డీస్ అత్యధికంగా 2 శాతానికి పైగా లాభంతో ట్రేడవుతోంది. రిలయన్స్, భారతీ ఎయిర్టెల్, ఐటీసీ షేర్ల కొనుగోలుకు మదుపర్లు మొగ్గు చూపుతున్నారు. అటు నిఫ్టీ సైతం ఫ్లాట్గా ట్రేడింగ్ కొనసాగిస్తోంది. 7 పాయింట్ల స్వల్ప నష్టంతో 16,363 వద్ద కొనసాగుతోంది.
ఇదీ చదవండి:
