ప్రముఖ స్మార్ట్ ఫోన్ల తయారీ సంస్థ ఒప్పో.. ఏకంగా రూ.4,389 కోట్ల కస్టమ్స్ సుంకం చెల్లించకుండా ఎగ్గొట్టినట్లు తేలింది. ఒప్పో సహా అనుబంధ సంస్థల కార్యాలయాలు, ఉన్నత ఉద్యోగుల నివాసాల్లో సోదాల తర్వాత ఈ విషయం నిర్ధరించినట్లు డైరక్టరేట్ ఆఫ్ రెవెన్యూ ఇంటెలిజెన్స్-డీఆర్ఐ వెల్లడించింది.
మొబైల్ ఫోన్ల తయారీ కోసం ఒప్పో భారత్కు దిగుమతి చేసుకున్న కొన్ని వస్తువుల వివరాల్ని తప్పుగా చూపినట్లు ఆధారాలు లభించాయని పేర్కొంది. ఇలా తప్పుడు వివరాలు సమర్పించడం ద్వారా 'ఒప్పో ఇండియా' సంస్థ అర్హత లేకపోయినా రూ.2,981కోట్ల మేర పన్ను మినహాయింపులు పొందినట్లు డీఆర్ఐ వివరించింది. సంస్థకు చెందిన కొందరు ఉన్నతాధికారులు సైతం ఈ విషయాన్ని అంగీకరించారని వెల్లడించింది.
చైనాలోని వేర్వేరు సంస్థలకు రాయల్టీ, లైసెన్స్ ఫీజు చెల్లించే విషయంలోనూ ఒప్పో ఇండియా సంస్థ రూ.1,408కోట్ల మేర సుంకం ఎగ్గొట్టిందని డీఆర్ఐ తేల్చింది. పన్ను ఎగవేతకు సంబంధించి ఆ సంస్థ ఇప్పటికే రూ.450కోట్లు స్వచ్ఛందంగా చెల్లించిందని తెలిపింది. బకాయిలు, పెనాల్టీలు అన్నీ కలుపుకుని.. మొత్తం రూ.4,389కోట్ల కస్టమ్స్ సుంకం చెల్లించాలని ఆ సంస్థకు షోకాజ్ నోటీసులు జారీ చేసినట్లు డైరక్టరేట్ ఆఫ్ రెవెన్యూ ఇంటెలిజెన్స్ వెల్లడించింది.
ఒప్పో, వన్ ప్లస్, రియల్మీ ఫోన్లను భారత్లో విక్రయిస్తుంది ఒప్పో ఇండియా.
వివో కేసులో ఇలా...
బ్యాంకు ఖాతాలు ఫ్రీజ్ చేయడాన్ని సవాలు చేస్తూ స్మార్ట్ ఫోన్ తయారీ సంస్థ వివో దాఖలు చేసిన పిటిషన్పై స్పందించాలని ఎన్ఫోర్స్మెంట్ డైరక్టరేట్ను ఆదేశించింది దిల్లీ హైకోర్టు. వారం రోజుల్లోగా ఈడీకి రూ.950కోట్లు బ్యాంకు గ్యారెంటీ ఇచ్చి, సంస్థకు చెందిన బ్యాంకు ఖాతాలను ఉపయోగించుకునేందుకు న్యాయస్థానం అనుమతి ఇచ్చింది. ఖాతాలు ఫ్రీజ్ చేసిన సమయంలో ఉన్న రూ.251కోట్ల బ్యాలెన్స్ను తగ్గకుండా చూడాలని వివోకు సూచించింది. విచారణను దిల్లీ హైకోర్టు జులై 28కి వాయిదా వేసింది.
మనీలాండరింగ్ సహా ఇతర ఆరోపణలపై వివోకు చెందిన వేర్వేరు కార్యాలయాల్లో జులై 5న ఈడీ దాడులు చేసింది. రూ.1200కోట్ల మేర అక్రమాలు జరిగాయని ఆరోపిస్తూ ఆ సంస్థకు చెందిన బ్యాంకు ఖాతాలు స్తంభింపచేసింది.
