గూగుల్ పే, ఫోన్ పే తరహాలో.. ఇకపై ట్విట్టర్లోనూ నగదు బదిలీ చేయొచ్చు. డిజిటల్ చెల్లింపుల కోసం ట్విట్టర్లో సరికొత్త ఫీచర్ను అందుబాటులోకి తెస్తున్నట్లు ఆ సంస్థను ఇటీవలే కొనుగోలు చేసిన వ్యాపార దిగ్గజం ఎలాన్ మస్క్ స్వయంగా వెల్లడించారు. బుధవారం రాత్రి అడ్వర్టైజర్లతో జరిగిన సమావేశంలో ఈ విషయం చెప్పారు మస్క్.
బ్లూటిక్ సబ్స్క్రిప్షన్ విధానమే.. ట్విట్టర్లో డిజిటల్ చెల్లింపులకు బాటలు వేస్తుందని అడ్వర్టైజర్లకు వివరించారు మస్క్. బ్లూటిక్ సబ్స్క్రైబర్లు క్రిడెట్ కార్డ్ లేదా డెబిట్ కార్డ్తోనే సైన్అప్ చేయాల్సి ఉంటుందని గుర్తు చేశారు. దానినే ఇతరులకు నగదు పంపేందుకూ విస్తరించనున్నట్లు తెలిపారు. ఇప్పటికే ఉన్న బ్యాంకు ఖాతా నుంచి ట్విట్టర్ ద్వారా యూజర్లు ఇతరులకు డిజిటల్ పేమెంట్స్ చేయొచ్చని వివరించారు మస్క్. బ్యాంకు ఖాతాకు బదులు... ట్విట్టర్ అకౌంట్లోనూ నగదు డిపాజిట్ చేసుకునే వెసులుబాటు కల్పిస్తామని, అలా జమ చేసే యూజర్లకు అధిక వడ్డీ కూడా చెల్లిస్తామని తెలిపారు. అలా క్రమంగా డెబిట్ కార్డ్లు, చెక్లు జారీ చేసి.. ఈ వ్యవస్థను సాధ్యమైనంతగా విస్తరిస్తామని వివరించారు ఎలాన్ మస్క్.
అనుమతుల కోసం దరఖాస్తు
ట్విట్టర్ ద్వారా డిజిటల్ చెల్లింపులకు వీలు కల్పించేలా అనుమతులు ఇవ్వాలని అమెరికాలోని సంబంధిత ప్రభుత్వ సంస్థలకు ఆ కంపెనీ గత వారమే దరఖాస్తు చేసినట్లు తెలిసింది.
ట్విట్టర్ అఫీషియల్‌ ట్యాగ్‌..
ట్విట్టర్లో బుధవారం కొన్ని ఖాతాలకు అఫీషియల్‌ అనే ట్యాగ్‌ను జత చేసిన ట్విట్టర్ ఈ ఫీచర్‌తో గందరగోళం తలెత్తడంతో కొద్ది గంటల్లోనే దాన్ని వెనక్కి తీసుకుంది. ట్విట్టర్ను కొనుగోలు చేసిన ఎలాన్ మస్క్.. ఇప్పటికే ఈ మాధ్యమంలో అనేక మార్పులకు శ్రీకారం చుట్టారు. ట్విట్టర్ ఖాతాల బ్లూ టిక్‌ కోసం నెలకు 8 డాలర్లు వసూలు చేస్తామని వెల్లడించారు. దీని వల్ల నకిలీ ఖాతాలు కూడా బ్లూ టిక్‌ను పొందే ప్రమాదముందని ఆందోళనలు వ్యక్తమయ్యాయి. దీంతో ట్విట్టర్ అఫీషియల్‌ ట్యాగ్‌ అనే ఫీచర్ను తీసుకొచ్చింది.
ప్రభుత్వ అధికారిక ఖాతాలు, ప్రముఖ వ్యాపార ప్రొఫైళ్లకు ఈ ట్యాగ్‌ను జత చేయనున్నట్లు సంస్థ ప్రకటించింది. బుధవారం సాయంత్రం నుంచి కొన్ని ఖాతాలకు ఈ అధికారిక ట్యాగ్‌ను జత చేశారు. భారత్‌లో ప్రధానమంత్రి నరేంద్రమోదీ సహా పలువురు కేంద్ర మంత్రులు, రాజకీయ, క్రీడా ప్రముఖులు, పలు మీడియా సంస్థల ఖాతాలకు ఈ ట్యాగ్‌ కన్పించింది. వీరితో పాటు కొందరు ప్రభుత్వేతర వ్యక్తుల ఖాతాలకు కూడా ఈ బ్యాడ్జ్‌ జత చేయడం గందర గోళానికి దారితీసింది. దీంతో గంటల వ్యవధిలోనే ఈ ఫీచర్ను ట్విటర్‌ తొలగించింది.
ఇవీ చదవండి:క్రెడిట్‌ కార్డ్ క్యాన్సిల్‌ చేయాలా? ఈ తప్పులు చేయొద్దు!
బిజినెస్లోనూ ధోనీ నెం.1.. బిగ్గెస్ట్ ట్యాక్స్ పేయర్గా ఘనత!
