Ratan Tata Legacy Maya Tata : రతన్ టాటా.. ఈ దిగ్గజ వ్యాపారవేత్త గురించి తెలియనివారు లేరు అంటే అది ఏమాత్రం అతిశయోక్తి కాదు. రతన్ టాటా నీతి, నిజాయితీ, నిబద్ధతకు నిలువుటద్దంగా నిలుస్తూ.. భావి తరాలకు ఆదర్శప్రాయంగా నిలుస్తున్నారు. అయితే ఆయన ఇప్పుడు టాటా గ్రూప్ బాధ్యతలను తన వారసులకు అప్పగించే యోచనలో ఉన్నారు. ఈ నేపథ్యంలోనే టాటా గ్రూప్ కూడా తదుపరి తరం టాటాలకు బాధ్యతలను అప్పగించే ప్రక్రియ చేపట్టింది. అందులో ప్రముఖంగా వినిపిస్తున్న పేరు మాయా టాటా.
మాయా టాటా
Who Is Maya Tata : రూ.20,71,467 కోట్ల విలువైన టాటా గ్రూప్ సంస్థల బాధ్యతలను త్వరలో మాయా టాటా స్వీకరించనున్నట్లు సమాచారం. 34 ఏళ్ల మాయా ఇటీవలే టాటా మెడికల్ సెంటర్ ట్రస్ట్ బోర్డు సభ్యురాలిగా బాధ్యతలు స్వీకరించారు. మాయాతో పాటు ఆమె సోదరి లేహ్, సోదరుడు నెవిల్లే కూడా టాటా గ్రూప్లోని కీలక స్థానాల్లో పనిచేస్తున్నారు. వీరందరూ వాస్తవానికి రతన్టాటా ఆధ్వర్యంలోనే వ్యాపార పాఠాలు నేర్చుకున్నారు.
Tata Family Tree : రతన్ టాటా సవతి సోదరుడు నోయెల్ టాటా. దివంగత పల్లోంజీ మిస్త్రీ కుమార్తె, టాటా గ్రూప్ మాజీ ఛైర్మన్ సైరస్ మిస్త్రీ సోదరి ఆలూ మిస్త్రీ. వీరిద్దరికీ ముగ్గురు పిల్లలు ఉన్నారు. వారిలో అందరి కంటే చిన్నది మాయా మిస్త్రీ.
విద్య - వ్యాపార అనుభవం
Maya Tata Education : మాయా టాటా యూకేలోని బేయర్స్ బిజినెస్ స్కూల్, ది యూనివర్సిటీ ఆఫ్ వార్విక్లో విద్యాభ్యాసం చేశారు. తరువాత టాటా గ్రూప్లో వివిధ హోదాల్లో పనిచేశారు. మొదటిగా ఆమె టాటా ఆపర్చూనిటీస్ ఫండ్లో పనిచేశారు. ఇది టాటా గ్రూప్కు సంబంధించిన టాటా క్యాపిటల్ అనే ప్రైవేట్ ఈక్విటీ ఫండ్ సంస్థ. అయితే ప్రస్తుతం దీనిని మూసేశారు.
మాయా టాటా తరువాత ఎన్ చంద్రశేఖరన్ ఆధ్వర్యంలో నడిచే రూ.1000 కోట్ల విలువైన టాటా డిజిటల్ కంపెనీలో పనిచేశారు. ప్రస్తుతం ఆమె టాటా మెడికల్ సెంటర్ ట్రస్ట్ బోర్డ్ మెంబర్గా ఉన్నారు. ఈ సంస్థ కలకత్తాలోని క్యాన్సర్ హాస్పిటల్ బాధ్యతలు చూస్తుంది. వాస్తవానికి ఈ క్యాన్సర్ ఆసుపత్రిని 2011లో రతన్ టాటా ప్రారంభించారు.
21 లక్షల కోట్ల విలువైన కంపెనీ!
Tata Group Net Worth : టాటా గ్రూప్ మొత్తం మార్కెట్ విలువ రూ.20,71,467 కోట్లు. 2023 మార్చి 31న వెలువరించిన వార్షిక నివేదిక ప్రకారం, వీటిలో టాటా సన్స్ కంపెనీ మాత్రమే రూ.11,20,575.24 కోట్ల విలువైన పెట్టుబడులను కలిగి ఉంది.
