Home Loan Fixed Vs Floating Interest Rate : గృహ, వాహన సహా ఇతర రుణాలపై అధిక వడ్డీ రేట్ల బాదుడుతో ఇబ్బంది పడుతున్న రుణగ్రహీతలకు ఉపశమనం కలిగించే నిర్ణయాన్ని ప్రకటించింది రిజర్వ్ బ్యాంక్ ఆఫ్ ఇండియా. తాము తీసుకున్న రుణాలపై ఫ్లోటింగ్ వడ్డీ రేట్ల నుంచి స్థిర వడ్డీ రేట్లకు మారేందుకు అవకాశాన్ని కల్పించే విధంగా ఉండే నూతన విధానాన్ని తీసుకురానున్నట్లు తెలిపింది. దీనికి సంబంధించిన మార్గదర్శకాల(Fixed Interest Rates In India)ను త్వరలోనే విడుదల చేస్తామని ద్వైమాసిక ద్రవ్యపరపతి విధాన సమీక్షపై ప్రకటన సందర్భంగా గురువారం ఉదయం ఆర్బీఐ గవర్నర్ శక్తికాంతదాస్ తెలిపారు. త్వరలో అమలులోకి రానున్న ఈ విధానానికి సంబంధించిన పూర్తి వివరాలను రుణదాతలు (బ్యాంకులు, రుణసంస్థలు) క్లుప్తంగా తమ వినియోగదారుకు లేదా రుణగ్రహీతలకు వివరించాలని ఆయన సూచించారు.
ఫిర్యాదులు అందినందునే..
Home Loan Fixed Or Floating : హోమ్ లోన్స్, వెహికిల్ లోన్స్ సహా ఇతర రుణాల గడువు విషయంలో వినియోగదారుల నుంచి తమకు ఫిర్యాదులు అందాయని.. ఇందులో రుణదాతలు కస్టమర్లతో ఎటువంటి కమ్యూనికేషన్ లేకుండానే ఇష్టానుసారంగా ఫ్లోటింగ్ రేట్ల లోన్ల కాలవ్యవధిని పెంచేస్తున్నారని ఆవేదన వ్యక్తం చేశారని గవర్నర్ చెప్పారు. ఈ సమస్యకు పరిష్కారంగా ఈ స్థిర వడ్డీ రేటు నూతన ఫ్రేమ్వర్క్ను రుణగ్రహీతల కోసం తెస్తున్నట్లు ఆయన స్పష్టం చేశారు.
"బ్యాంకులు, రుణసంస్థలు అనుసరిస్తున్న తీరుపై మాకు ప్రజల నుంచి ఫిర్యాదులు అందాయి. రుణదాతలు తమ(రుణగ్రాహీతలు)కు ఎటువంటి సమాచారం ఇవ్వకుండానే ఫ్లోటింగ్ రేట్ రుణాల గడువును అనూహ్యంగా పొడిగిస్తున్నాయని మాకు వారు సమాచారం ఇచ్చారు. వీటిని అరికట్టేందుకే ఈ స్థిర వడ్డీ రేటు విధానాన్ని తేనున్నాం."
- శక్తికాంతదాస్, ఆర్బీఐ గవర్నర్
ప్రభుత్వంతో సంప్రదింపులు జరిపాకే..
Loans Fixed OR Variable : మొత్తంగా లోన్ల వ్యవధి పెంపు, ఈఎమ్ఐలో మార్పులు, విధించే ఛార్జీలు, ఫ్లోటింగ్ రేట్ నుంచి స్థిర వడ్డీ రేటుకి మారడం వంటి ప్రతి విషయాన్ని కచ్చితంగా రుణగ్రహీతలకు తెలియజేయాల్సని పూర్తి బాధ్యత రుణదాతలేదనని ఆర్బీఐ పునరుద్ఘాటించింది. దీనికి సంబంధించిన మార్గదర్శకాలు త్వరలోనే విడుదల కానున్నాయి. అలాగే మౌలిక వసతుల రంగంలో ఇన్‌ఫ్రాస్ట్రక్చర్ డెట్ ఫండ్‌లను మరింత పటిష్ఠం చేసేందుకు, వివిధ రకాల ఎన్బీఎఫ్సీల నిబంధనలను సమన్వయం చేసేందుకు కూడా ఈ విధానం ఉపయోగపడుతుందని శక్తికాంత దాస్ వివరించారు. దీనిని ఉన్నతస్థాయి నిపుణులతో పాటు ప్రభుత్వ సహకారంతో కలిసి రూపొందిస్తున్నట్లుగా ఆయన అన్నారు.
అసలేంటీ స్థిర, ఫ్లోటింగ్ వడ్డీ రేట్లు..?
What Is Fixed And Floating Rate Of Interest : మనం తీసుకునే వివిధ రుణాలపై దాని కాలవ్యవధి ముగిసేసరికి ఒకే రకమైన వడ్డీని వసూలు చేస్తే దాన్ని స్థిర వడ్డీ రేటు అంటారు. అదే ఫ్లోటింగ్ వడ్డీ రేట్ల విధానంలో మనం తీసుకునే గృహ, వాహన, ఇతర రుణాలపై వడ్డీ రేట్లు తరచుగా మారుతుంటాయి. ఇవీ మార్కెట్లో నెలకొన్న పరిస్థితులపై ఆధారపడి ఉంటుంది. ప్రస్తుతం ఈ విధానాన్నే దేశంలోని దాదాపు అన్ని బ్యాంకులు అనుసరిస్తున్నాయి. దీనిని వేరియబుల్ ఇంట్రెస్ట్ రేట్ అని కూడా అంటారు.
