Gautam Adani Hindenburg Report : హిండెన్బర్గ్ నివేదికపై అదానీ గ్రూప్ సంస్థల ఛైర్మన్ గౌతమ్ అదానీ మరోసారి మండిపడ్డారు. అదానీ వ్యాపారాలకు సంబంధించి హిండెన్బర్గ్ విడుదల చేసిన నివేదిక కేవలం తప్పుడు సమచారం అందించడమే కాకుండా తమను అపఖ్యాతి పాలు చేయడమే లక్ష్యంగా పెట్టుకుందని ఆయన ఆరోపించారు.
పూర్తిగా దురుద్దేశపూరితమైన నివేదిక..
Hindenburg Research Adani Group : అదానీ కంపెనీ వార్షిక సర్వసభ్య సమావేశం (ఏజీఎం)లో వాటాదారులను ఉద్దేశించి గౌతమ్ అదానీ మంగళవారం ప్రసంగించారు. "భారత చరిత్రలోనే అతిపెద్ద ఫాలో ఆన్‌ పబ్లిక్ ఆఫరింగ్‌ (ఎఫ్‌పీఓ)ను ప్రారంభించేందుకు మేం సిద్ధపడుతున్న వేళ.. హిండెన్బర్గ్ ఈ నివేదికను ప్రచురించింది. తప్పుడు సమాచారం, నిరాధార ఆరోపణలతో ఆ నివేదికను తయారు చేసింది. ఇందులోని ఎక్కువ శాతం వివరాలు 2004 నుంచి 2015 మధ్య నాటివేనని.. ఆ సమయంలో ఉన్న లోటుపాట్లను అప్పుడు అధికారులు పరిష్కరించారు. మా ప్రతిష్ఠను దెబ్బతీయడమే కాకుండా మా స్టాక్ ధరలను తగ్గించి లాభాలను ఆర్జించాలన్న లక్ష్యంతోనే ఉద్దేశపూర్వకంగా చేసిన ప్రయత్నం అది." అని గౌతమ్ అదానీ పేర్కొన్నారు. వాటిని ఇప్పుడు మళ్లీ ప్రజల ముందుంచి తమ ప్రతిష్ఠను ఉద్దేశపూర్వకంగా దెబ్బతీయడానికి హిండెన్బర్గ్ తప్పుడు నివేదిక తయారు చేసిందని ఆయన ఆరోపించారు. మొత్తంగా హిండెన్బర్గ్ నివేదిక పూర్తిగా దురుద్దేశపూరితమని.. ఆ కమిటీ ఇచ్చిన నివేదికతో షేర్‌హోల్డర్లలో విశ్వాసం మరింత పెరిగిందని ఆయన అన్నారు.
అదానీ గ్రూప్ సంస్థలపై అమెరికాకు చెందిన షార్ట్‌ సెల్లర్‌ సంస్థ హిండెన్బర్గ్ ఇచ్చిన నివేదిక దేశవ్యాప్తంగా తీవ్ర సంచలనం సృష్టించింది.
"హిండెన్బర్గ్ నివేదిక ఆధారంగా కొన్ని సంస్థలు మా కంపెనీపై తప్పుడు సమాచారాన్ని వ్యాప్తి చేసేందుకు సోషల్ మీడియాలో పెద్ద ఎత్తున ప్రచారం చేశాయి. అనంతరం ఈ విషయం సుప్రీం కోర్టు వరకు వెళ్లడం వల్ల దీని పరిశీలనకు ఉన్నత న్యాయస్థానం ఓ నిపుణులు కమిటీని కూడా ఏర్పాటు చేసింది. మా కంపెనీ ఎలాంటి నిబంధనల ఉల్లంఘలనకు పాల్పడలేదని కమిటీ స్పష్టం చేసింది. ఆ కమిటీ నివేదికతో వాటాదారుల్లో విశ్వాసం మరింత పెరిగింది. కొందరు భారతీయులను లక్ష్యంగా చేసుకొని దేశంలో ఆర్థిక అస్థిరతను నెలకొల్పడమే లక్ష్యంగా ఈ హిండెన్బర్గ్ రిపోర్ట్ను తయారు చేయించారని మే నెలలో కమిటీ రిపోర్ట్ ఇచ్చింది."
- గౌతమ్ అదానీ, అదానీ సంస్థల ఛైర్మన్
ప్రస్తుతం హిండెన్బర్గ్ ఇచ్చిన నివేదికను సెక్యూరిటీస్‌ అండ్ ఎక్స్ఛేంజ్‌ బోర్డ్‌ ఆఫ్‌ ఇండియా(సెబీ) పరిశీలిస్తోంది.
