GOM Meeting On GST : క్యాసినో, గుర్రపు పందేలు, ఆన్లైన్ గేమింగ్పై 28 శాతం జీఎస్టీ విధించాలని మంత్రుల కమిటీ నిర్ణయానికి వచ్చింది. మేఘాలయ ముఖ్యమంత్రి కాన్రాడ్ సంగ్మా నేతృత్వంలో బంగాల్, ఉత్తర్ప్రదేశ్, గోవా, తమిళనాడు, తెలంగాణ, గుజరాత్, మహారాష్ట్ర ఆర్థిక మంత్రులు సమావేశమై గురువారం ఈమేరకు ఏకాభ్రిప్రాయానికి వచ్చారు. ఈ సమావేశంలో చర్చించిన విషయాలపై పూర్తి నివేదిక సిద్ధం చేసి త్వరలో జీఎస్టీ మండలికి సమర్పించనున్నారు.
GST on betting and Gambling : పన్నుల రేటును పరిశీలించడం.. దాంతో పాటు ఈ పన్నును గ్రాస్ గేమింగ్ రెవెన్యూ (సీజీఆర్)పై విధించాలా, ప్లాట్ఫామ్ వసూలు చేసే ఫీజుపై విధించాలా లేదా క్యాసినో, గుర్రపు పందేలు, ఆన్లైన్ గేమింగ్ ఆడేవారు పెట్టే పూర్తి ముఖ విలువ (ఫేస్ వాల్యూ)పై విధించాలా అనే అంశాలపై మంత్రుల కమిటీ సభ్యులు భిన్నాభిప్రాయాలు వ్యక్తం చేశారు. ఈ అంశాలపై జులై 11న జరిగే జీఎస్టీ మండలి సమావేశంలో చర్చించి తుది నిర్ణయం తీసుకునే అవకాశం ఉంది. క్యాసినో, గుర్రపు పందేలు, ఆన్లైన్ గేమింగ్లు.. బెట్టింగ్, జూదం యాక్షనబుల్ క్లెయిమ్(actionable claim) పరిధిలోకి వస్తాయా లేదా అన్న విషయంలో కూడా తుది నిర్ణయం తీసుకునే అవకాశం ఉంది.
ఈ సమావేశంలో.. బెట్టింగ్ల పూర్తి ముఖ విలువపై 28 శాతం పన్ను విధించాలని బంగాల్, ఉత్తర్ప్రదేశ్ రాష్ట్రాలు అభిప్రాయపడ్డాయి. అయితే, ఫ్లాట్ఫామ్ ఫీజుపై 28 శాతం పన్ను విధించాలని గుజరాత్ సూచించింది. కానీ గోవా మాత్రం క్యాసినోల గ్రాస్ గేమింగ్ రెవెన్యూ (సీజీఆర్)పై 28 శాతం విధించి.. ఫ్లాట్ఫామ్ ఫీజుపై 18 శాతం జీఎస్టీ వసూలు చేయాలని కోరింది. ఈ మూడింటిలో ఏదో ఒక దానిపై 28 శాతం పన్ను విధించాలని మేఘాలయ అభిప్రాయం వ్యక్తం చేసింది. దీంతో పాటు జూదం, బెట్టింగ్ల్లోని విజేతలకు చెల్లింపు చేయడానికి ప్రైజ్మనీ పూలింగ్ చేసేలా 'ఎస్క్రో ఖాతా' (Escrow Account) కోసం ఒక ప్రత్యేక వ్యవస్థ ఉండాలని.. దాని వల్ల పన్ను నిర్వహణ సులభతరం అవుతుందని అభిప్రాయపడింది.
క్యాసినో, గుర్రపు పందేలు, ఆన్లైన్ గేమింగ్లు.. బెట్టింగ్, జూదం యాక్షనబుల్ క్లెయిమ్ పరిధిలోకి వస్తాయని జీఎస్టీ మండలి నిర్ణయం తీసుకుంటే.. సీజీఆర్పై 28 శాతం పన్ను విధించాలని తమిళనాడు, తెలంగాణ తమ అభిప్రాయాన్ని వ్యక్తం చేశాయి. అయితే, ఈ విషయంలో సభ్యుల మధ్య భిన్నాభిప్రాయాలు వ్యక్తం కావడం వల్ల.. తుది నిర్ణయాన్ని జీఎస్టీ మండలికి వదిలేసింది మంత్రుల కమిటీ.
బెట్టింగ్ల పూర్తి విలువపై 28 శాతం జీఎస్టీ విధించాలని గతేడాది జూన్లో జీఎస్టీ మండలికి సమర్పించిన నివేదికలో మంత్రుల కమిటీ సూచించింది. ఆ తర్వాత జరిగిన 47వ జీఎస్టీ మండలి విడుదల చేసిన నివేదికపై గోవా కొన్ని అభ్యంతరాలు వ్యక్తం చేసింది. మరికొన్ని రాష్ట్రాలు కూడా నివేదికను పునఃసమీక్షించాలని డిమాండ్ చేశాయి. దీంతో మంత్రుల కమిటీ సమర్పించిన నివేదికను మళ్లీ పరిశీలించాలని జీఎస్టీ మండలి ఆదేశించింది. అనంతరం మంత్రుల కమిటీ మూడు సార్లు సమావేశమైంది. క్షేత్ర సందర్శనలు నిర్వహించి పరిశ్రమ సభ్యులతో చర్చలు జరిపింది.
