ప్రముఖ ద్విచక్రవాహనాల తయారీ సంస్థ 'హీరో మోటోకార్ప్' ఎగ్జిక్యూటివ్ ఛైర్పర్సన్ పవన్ కాంత్ ముంజాల్ ఇంటిపై ఎన్ఫోర్స్మెంట్ డైరెక్టరేట్ దాడులు నిర్వహించింది. మంగళవారం ఆయన ఇంట్లో నిర్వహించిన ఈ సోదాల్లో భారత, విదేశీ కరెన్సీని స్వాధీనం చేసుకున్నట్లు ఈడీ తెలిపింది. బంగారు, డైమండ్ ఆభరణాలను సీజ్ చేసినట్లు తెలిపింది. వీటన్నింటి విలువ రూ.25 కోట్ల వరకు ఉంటుందని వెల్లడించింది.
పవన్ కాంత్ ముంజాల్ (69) ఇల్లు, కార్యాలయాలతో పాటు హీరో మోటోకార్ప్ లిమిటెడ్, హీరో ఫిన్కార్ప్ లిమిటెడ్కు చెందిన హేమంత్ దహియా, కేఆర్ రామన్ ఇళ్లలోనూ సోదాలు చేసినట్లు ఈడీ తెలిపింది. దిల్లీ, గురుగ్రామ్లలో ఈ సోదాలు నిర్వహించింది. మనీలాండరింగ్ కేసు దర్యాప్తులో భాగంగా ఈ దాడులు నిర్వహించినట్లు ఈడీ తెలిపింది. అయితే, ఏ ఇంటి నుంచి ఎంత మొత్తంలో ఆస్తులు సీజ్ చేశారన్న విషయంపై ఈడీ స్పష్టతనివ్వలేదు. హీరో కంపెనీ సైతం దీనిపై వివరణ ఇవ్వలేదు. మంగళవారం సోదాలు జరుగుతున్న సమయంలో మాత్రం.. ఈడీ అధికారులకు సహకరిస్తున్నట్లు ప్రకటన విడుదల చేసింది హీరో మోటోకార్ప్. విదేశీ, భారత కరెన్సీతో పాటు నేర నిరూపణకు సంబంధించిన పలు పత్రాలను స్వాధీనం చేసుకున్నట్లు ఈడీ తాజాగా వెల్లడించింది. హార్డ్ డిస్క్లు, మొబైల్స్ను స్వాధీనం చేసుకున్నామని తెలిపింది.
కేసు ఇదీ..
మనీ లాండరింగ్‌ నియంత్రణ చట్టంలోని నిబంధనల కింద ముంజాల్పై దాఖలైన ఫిర్యాదు ఆధారంగా ఈ దర్యాప్తును ఈడీ ప్రారంభించిందని అధికారులు తెలిపారు. కేంద్ర పరోక్ష పన్నులు, కస్టమ్స్ బోర్డు (సీబీఐసీ)కు చెందిన దర్యాప్తు విభాగం డైరెక్టరేట్ ఆఫ్‌ రెవెన్యూ ఇంటెలిజెన్స్‌ ముంజాల్పై ఈ ఫిర్యాదు చేసిందని వెల్లడించారు.
2018లో ముంజాల్ లండన్ పర్యటనకు సంబంధించి ఈ కేసు నమోదైంది. వ్యాపార పర్యటన నిమిత్తం 2018లో లండన్కు వెళ్లిన పవన్ ముంజాల్.. ఇందుకు సంబంధించిన ఏర్పాట్లను చూసుకునేందుకు థర్డ్ పార్టీ సేవల సంస్థకు చెందిన ఓ అధికారిని హీరో మోటోకార్ప్ ద్వారా నియమించుకున్నారు. పర్యటన నిమిత్తం ముంజాల్తో పాటు థర్డ్ పార్టీ సేవల సంస్థ అధికారి లండన్కు వెళ్లేందుకు దిల్లీ అంతర్జాతీయ విమానాశ్రయానికి వెళ్లారు. అయితే, ముంజాల్తో పాటు ఉన్న ఆ వ్యక్తి లగేజీ బ్యాగ్ను విమానాశ్రయ సిబ్బంది తనిఖీ చేశారు. ఆ బ్యాగ్లో రూ.81 లక్షలకు పైగా విదేశీ కరెన్సీ బయటపడింది. దీంతో ఈ కరెన్సీని కస్టమ్స్ అధికారులు జప్తు చేశారు. విదేశీ మారకపు నిర్వహణ చట్టం కింద దీనిపై కేసు నమోదు చేశారు. దీని ఆధారంగానే ప్రస్తుతం ఈడీ దర్యాప్తు చేస్తోంది.
