Acer EV Scooter Launch : తెవాన్కు చెందిన ప్రముఖ మల్టీనేషనల్ టెక్నాలజీ కార్పొరేషన్ ఏసర్.. ఇండియన్ మార్కెట్లో తన మొదటి ఎలక్ట్రిక్ స్కూటర్ MUVI 125 4Gని లాంఛ్ చేసింది. భారతీయ ఎలక్ట్రిక్ మొబిలిటీ ప్లాట్ఫారమ్ eBikeGo భాగస్వామ్యంతో ఈ సరికొత్త ఈవీ స్కూటర్ను తీసుకురావడం జరిగింది. వాస్తవానికి ఈ స్కూటర్ రూపకల్పన, తయారీ మొత్తం 'ఈబైక్గో' ఆధ్వర్యంలోనే జరిగింది.
ప్రీ-బుకింగ్స్
ఏసర్ కంపెనీ త్వరలోనే MUVI 125 4G ఎలక్ట్రిక్ స్కూటర్ ప్రీ-బుకింగ్స్ను ఓపెన్ చేయనుంది. అందుకే ఆసక్తిగల ఆటోమొబైల్ డీలర్లను ఆహ్వానిస్తున్నట్లు పేర్కొంది. ఆసక్తిగలవారు పూర్తి వివరాల కోసం ఏసర్ అధికారిక వెబ్సైట్ను దర్శించాలి.
MUVI 125 4G Features :
ఏసర్ కంపెనీ 2023 సెప్టెంబర్లో గ్రేటర్ నోయిడాలో జరిగిన 'ఈవీ ఇండియా ఎక్స్పో'లో ఈ MUV1 125 స్కూటర్ను ప్రదర్శించింది. తాజాగా దీనిని హైదరాబాద్లో లాంఛ్ చేసింది.
- ఈ ఏసర్ ఎలక్ట్రిక్ స్కూటర్లో 48V, 35.2Ah సామర్థ్యం గల రెండు స్వాపబుల్ బ్యాటరీలు అమర్చారు. అందువల్ల వీటిని చాలా సులువుగా మార్చుకోవడానికి వీలవుతుంది.
- ఈ బ్యాటరీలను ఒక్కసారి ఫుల్ ఛార్జ్ చేస్తే.. 80 కి.మీ (రేంజ్) వరకు ప్రయాణం చేయవచ్చు. అలాగే ఈ ఎలక్ట్రిక్ స్కూటర్తో గరిష్ఠంగా గంటకు 75 కి.మీ వేగంతో ప్రయాణించవచ్చు.
- ఏసర్ ఎలక్ట్రిక్ స్కూటర్లో అమర్చిన ఈ రెండు బ్యాటరీలను ఫుల్ ఛార్జ్ చేయడానికి సుమారు 4 గంటల సమయం పడుతుంది. ఇక్కడ గుర్తుంచుకోవాల్సిన అంశం ఏమిటంటే.. రైడర్ అవసరమైతే కేవలం ఒక్క బ్యాటరీతోనూ బైక్ను నడపవచ్చు.
MUVI 125 4G Specs :
ఏసర్ తీసుకువచ్చిన ఈ ఎలక్ట్రిక్ స్కూటర్ పట్టణాల్లో ప్రయాణించడానికి చాలా అనువుగా ఉంటుందని సమాచారం. వాస్తవానికి ఈ స్కూటర్లో చాలా తేలికైన, ధృఢమైన ఛాసిస్ను అమర్చారు. పైగా దీనిని షాక్ అబ్జార్బర్ సిస్టమ్తో అనుసంధానించారు. ఇది రైడర్కు మంచి స్థిరత్వాన్ని, రైడింగ్ అనుభవాన్ని ఇస్తుంది. ఈ స్కూటర్లో 16 అంగుళాల సన్నని చక్రాలు ఉంటాయి. కనుక చాలా స్మూత్గా రైడింగ్ చేసుకోవచ్చు.
టెక్ ప్రియుల కోసం..
టెక్ ప్రియులకు ఈ ఏసర్ స్కూటర్ చాలా అనువుగా ఉంటుంది. ముఖ్యంగా దీనిలో బ్లూటూత్ ఫెసిలిటీ సహా, 4 అంగుళాల ఎల్సీడీ స్క్రీన్ను అమర్చారు. ఇక్కడ ఉన్న బెస్ట్ ఛాయిస్ ఏమిటంటే.. ఆండ్రాయిడ్, ఐఓఎస్ స్మార్ట్ఫోన్ ఉపయోగించి.. ఈ స్కూటర్ను ఇంటరాక్టివ్ మెషీన్గా కూడా మార్చకోవచ్చు.
Acer MUVI 125 Color Variants : ఏసర్ కంపెనీ తీసుకువచ్చిన ఈ ఎలక్ట్రిక్ స్కూటర్.. వైట్, బ్లాక్, గ్రే అనే మూడు కలర్ వేరియంట్స్లో లభిస్తుంది.
Acer MUVI 125 Price : ఏసర్ కంపెనీ ఈ నయా ఎలక్ట్రిక్ స్కూటర్ ధరను రూ.1,00,000 (ఎక్స్-షోరూం)గా నిర్ణయించింది.
