వారాంతంలో భారీ లాభాలతో ముగిసిన స్టాక్ మార్కెట్లు నేడు కుదేలయ్యాయి. తొలుత 10 శాతం నష్టపోయిన కారణంగా 45 నిమిషాల పాటు ట్రేడింగ్ను నిలిపేశాయి ఎక్స్ఛేంజిలు. పునఃప్రారంభమైన తర్వాత కూడా పరిస్థితులు ఏమీ మారలేదు. అంతకంతకూ నష్టాలు పెరిగి 13 శాతం మేర మార్కెట్లు పతనమయ్యాయి.
బొంబాయి స్టాక్ ఎక్స్ఛేంజి సూచీ- సెన్సెక్ 3,935 పాయింట్లు పతనమై 25,981 పాయింట్లకు చేరుకుంది. 1,135 పాయింట్లు దిగజారిన జాతీయ స్టాక్ ఎక్స్ఛేంజి సూచీ- నిఫ్టీ 7,610 పాయింట్లు పడిపోయింది.
అన్నీ నష్టాల్లోనే..
యాక్సిస్ బ్యాంక్, ఇండస్ ఇండ్ బ్యాంక్, బజాజ్ ఫినాన్స్ 20 శాతానికిపైగా నష్టపోయాయి. ఐసీఐసీఐ బ్యాంకు, మారుతీ సుజుకీ, ఎల్ అండ్ టీ, టెక్ మహీంద్రా షేర్లు 15 శాతానికిపైగా పడిపోయాయి.
భారత్లో లాక్డౌన్..
దేశంలో ఏపీ, తెలంగాణ, పంజాబ్‌, ఉత్తరాఖండ్‌, ఝార్ఖండ్‌, జమ్ము-కశ్మీర్‌, చండీగఢ్‌లు మార్చి 31వరకు పూర్తిగా లాక్‌డౌన్‌ను ప్రకటించాయి. వైరస్ ప్రభావిత 80 జిల్లాలలో కేంద్రం లాక్డౌన్ విధించింది. మారుతీ సుజుకీ, మహీంద్రా, హీరోమోటోకార్ప్ ప్లాంట్లలో కార్యకలాపాలను నిలిపివేశాయి. మరోపక్క ఎల్‌జీ కూడా భారత్‌లోని రెండు ప్లాంట్లను మూసివేస్తున్నట్లు ప్రకటించింది.
భారత్లో కరోనా వైరస్ నిర్ధరిత కేసులు రోజురోజుకు పెరుగుతున్నాయి. సోమవారం నాటికి కరోనా కేసులు 415కు చేరుకున్నాయని భారత వైద్య పరిశోధన మండలి (ఐసీఎంఆర్) ప్రకటించింది. ఇప్పటివరకు కరోనా ధాటికి దేశంలో ఏడుగురు మృతి చెందారు.
అంతర్జాతీయ మార్కెట్ల ప్రభావం..
జపాన్‌ మార్కెట్ మినహా మిగిలిన ఆసియా మార్కెట్లు భారీ నష్టాల్లో ముగిశాయి. ఆ ప్రభావం కూడా దేశీయ మార్కెట్లపై పడింది. న్యూజిలాండ్ 9 శాతానికి పైగా నష్టపోగా.. ఆస్ట్రేలియా సూచీలు 6 శాతం పతనమయ్యాయి.
అమెరికా బెయిల్ అవుట్ ప్యాకేజీపై సందిగ్ధత..
అమెరికాకు 1.7 ట్రిలియన్‌ డాలర్ల ఉద్దీపన ప్యాకేజీ ఆమోదంపై తీవ్రమైన ఉత్కంఠ నెలకొనటం ప్రపంచ మార్కెట్లను కలవరపెట్టింది. అక్కడ వైద్యసేవలకు నిధులు అవసరమైన సమయంలో జాప్యం చేయకుండా మంజూరు చేయాలనే డిమాండ్లు నెలకొన్నాయి. కీలకమైన ఓట్లను ఇది ఇంకా సాధించలేదనే ప్రచారంతో అక్కడ ఆందోళన నెలకొంది.
సెబీ నిబంధనల ప్రభావం..
సెబీ ఆదేశాల వల్ల ఎఫ్‌ఐఐలు, డీఐఐలకు ప్రస్తుతం షార్ట్‌సెల్లింగ్‌కు అవకాశం లేకుండా పోయింది. అందువల్ల మార్కెట్ హెచ్చుతగ్గులపై ప్రభావం చూపుతోందే కానీ.. మార్కెట్ ట్రెండ్‌ను మార్చలేకపోయింది. ఇప్పటి వరకు సెబీ ఆశించినట్లుగా హెచ్చుతగ్గులైతే పరిమితంగానే ఉన్నాయి. విక్రయించే ట్రెండింగ్‌లో మార్పులేదు.
