Stock market news: బేర్ పంజాతో స్టాక్ మార్కెట్లు వరుసగా మూడో రోజు భారీ నష్టాలను చవిచూశాయి. మూడు సెషన్లలోనే సెన్సెక్స్ 2000 పాయింట్లకుపైగా నష్టపోయింది. మదుపర్ల రూ.లక్షల కోట్ల సంపద ఆవిరైంది. గురువారం సెషన్లో అంతర్జాతీయంగా మిశ్రమ పవనాలు, ద్రవ్యోల్బణ భయాలు మదుపర్ల సెంటిమెంట్ను తీవ్రంగా ప్రభావితం చేశాయి. దీంతో ఒకానొక దశలో దాదాపు 1000 పాయింట్లు పతనమైన సెన్సెక్స్ చివర్లో కాస్త కోలుకుంది. 634 పాయింట్లు నష్టపోయి 60వేల దిగువన 59,464 వద్ద ముగిసింది. నిఫ్టీ 181 పాయింట్లు కోల్పోయి 17,757కు దిగొచ్చింది.
కారణాలివే...
- అంతర్జాతీయ విపణుల నుంచి మిశ్రమ పవనాలు స్టాక్ మార్కెట్ల పతనానికి కారణమయ్యాయి. ద్రవ్యోల్బణం రికార్డు స్థాయిలో పెరిగే సూచనలు కన్పిస్తుండటం, ఫెడ్ వడ్డీ రేట్లు కూడా పెరుగుతాయనే భయాందోళనల నడుమ మదుపర్లకు అమ్మకాలకు మొగ్గు చూపారు.
- ముడి చుమురు ధరలు ఏడు సంవత్సారాల గరిష్ఠానికి చేరడం కూడా మదుపర్లపై ప్రతికూల ప్రభావం చూపింది. అంతర్జాతీయ మార్కెట్లో క్రూడ్ ఆయిల్ ధరలు పెరిగినప్పటికీ భారత్లో పెట్రోల్, డీజిల్ స్థిరంగా ఉన్నాయి. అయితే అసెంబ్లీ ఎన్నికల అనంతరం చమురు ధరలు పెరిగే అవకాశముందనే భయాలు సూచీల పతనానికి మరో కారణం.
- దేశంలో ఒమిక్రాన్ వ్యాప్తి తర్వాత కరోనా కేసులు రికార్డు స్థాయిలో నమోదవుతుండటం కూడా మార్కెట్లపై ప్రతికూల ప్రభావం చూపింది. కేసుల సంఖ్య గురువారం మూడు లక్షలు దాటడం మదుపర్లను ప్రభావితం చేసింది.
లాభనష్టాల్లోనివి ఇవే..
- బజాజ్ ఫిన్సర్వ్, బజాజ్ ఆటో, దివిస్ ల్యాబ్స్, సన్ ఫార్మా, ఇన్ఫోసిస్ షేర్లు నష్టాల్లో ముగిశాయి.
- పవర్ గ్రిడ్ కార్ప్, భారతీ ఎయిర్టెల్, గ్రాసిమ్, జేఎస్డ్బ్లూ స్టీల్, బ్రిటానియా షేర్లు లాభాలు గడించాయి.
సంబంధం కోసం వెతుకుతున్నారా? తెలుగు మాట్రిమోని లో రిజిస్ట్రేషన్ ఉచితం!
ఇదీ చదవండి: ఉద్యోగం మారేందుకే 82 శాతం మొగ్గు.. అదే కారణం!
