ఈ ఏడాది ఏప్రిల్ నుంచి సరళీకరించిన జీఎస్టీ రిటర్న్ విధానాన్ని తీసుకొస్తామని కేంద్ర ఆర్థిక మంత్రి నిర్మలా సీతారామన్ తెలిపారు. జీఎస్టీని చారిత్రక సంస్కరణగా అభివర్ణించిన ఆమె... వస్తు సేవల పన్ను ప్రవేశంతో దేశం ఆర్థికంగా బలపడిందన్నారు.
లోక్సభలో బడ్జెట్ ప్రవేశపెట్టారు సీతారామన్. దేశ ఆర్థిక వ్యవస్థను మార్చేసిన జీఎస్టీకి ఆద్యుడిగా మాజీ ఆర్థిక మంత్రి, దివంగత అరుణ్ జైట్లీని కొనియాడారు నిర్మలా సీతారామన్.
"ప్రతి వస్తువుపై క్రమంగా పన్ను తగ్గుతూ వచ్చింది. చాలా రేట్ల తగ్గింపుతో ఏటా రూ. లక్ష కోట్లు మేర వినియోగదారులు లాభపడ్డారు. మొత్తంగా చూస్తే 10 శాతం పన్ను రేట్లు తగ్గాయి. ఫలితంగా సగటు వ్యక్తి నెలవారీ ఖర్చులు 4 శాతం తగ్గాయి.
రెండేళ్ల కాలంలో కొత్తగా 60 లక్షల మంది పన్ను చెల్లింపుదారులు చేరారు. 40 కోట్ల రిటర్నులు దాఖలయ్యాయి. 800 కోట్ల ఇన్వాయిస్ అప్లోడ్ అయ్యాయి. 105 కోట్ల ఈ-వే బిల్లులు వచ్చాయి. ఈ నేపథ్యంలో ఏప్రిల్ నుంచి సరళీకరించిన జీఎస్టీ రిటర్న్ విధానాన్ని తీసుకొస్తాం."
- నిర్మలా సీతారామన్, కేంద్ర ఆర్థిక మంత్రి
బడ్జెట్ ప్రసంగాన్ని ప్రారంభిస్తూ.. ఈ పద్దు ప్రజల ఆకాంక్షలను నెరవేరస్తుందని ఆమె వ్యాఖ్యానించారు. ఆదాయ పెంపు, ప్రజల కొనుగోలు శక్తిని పెంచే విధంగా బడ్జెట్ను రూపొందించామని స్పష్టం చేశారు.
