నోట్ల రద్దు అనంతరం ప్రవేశపెట్టిన రూ. 2000 నోట్ల ముద్రణ నిలిపివేసి రెండేళ్లు అయ్యింది. ఈ విషయాన్ని.. లోక్సభకు అందించిన లిఖితపూర్వక సమాధానంలో కేంద్ర ఆర్థికశాఖ సహాయ మంత్రి అనురాగ్ ఠాకూర్ వెల్లడించారు.
2018 మార్చి 30 నాటికి రూ. 2000 నోట్లు.. చలామణిలో ఉన్న మొత్తం నోట్లలో 3.27శాతంగా ఉండేవని ఠాకూర్ పేర్కొన్నారు. 2021 ఫిబ్రవరి 26 నాటికి అది 2.01శాతానికి(2,499 మిలియన్) పడిపోయిందని స్పష్టం చేశారు. 2019-20, 2020-21 కాలంలో.. రూ. 2వేల నోట్లను ముద్రించమని ప్రింటింగ్ ప్రెస్లకు ఎలాంటి ఆర్డర్లు ఇవ్వలేదన్నారు ఠాకూర్.
రూ. 2వేలకు సంబంధించి.. 2016-17 ఆర్థిక సంవత్సరంలో 3,542.99 మిలియన్ నోట్లను ముద్రించినట్టు ఆర్బీఐ 2019లో ప్రకటించింది. 2017-18లో 111.507 మిలియన్ నోట్లు మాత్రమే ముద్రించారు. 2018-19 నాటికి అది 46.690 మిలియన్కు పడిపోయింది.
ఆ తర్వాత ఒక్క కొత్త నోటు ముద్రణ కూడా జరగలేదు.
ఇదీ చూడండి:- ఆ కుటుంబాల నుంచి రూ.12వేల కోట్ల విరాళాలు!
