సాగుచట్టాలకు వ్యతిరేకంగా దిల్లీ సరిహద్దుల్లో ఆందోళనలు కొనసాగుతున్న వేళ తమ ప్రభుత్వం అన్నదాతల శ్రేయస్సుకు కట్టుబడి ఉందని 2021బడ్జెట్ ప్రసంగంలో.. కేంద్ర ఆర్థికమంత్రి నిర్మలా సీతారామన్ స్పష్టం చేశారు. అన్ని పంటల కనీసమద్దతు ధర పెంచడం సహా.. టమోట, బంగాళదుంప, ఉల్లిపాయలతో పాటు ఎగుమతులు చేసే పంట ఉత్పత్తుల సంఖ్యను 22కు పెంచుతున్నట్లు తెలిపారు. రుణ వితరణ లక్ష్యాన్ని కూడా పెంచుతున్నామన్నారు. యూపీఏ హయాంలో గోధుమ రైతులకు చెల్లించిన మొత్తం.. 2019-20కి రెండింతలైందన్న నిర్మల.. ధాన్యం చెల్లింపులు ఒకటిన్నర రెట్లు వరకు పెరిగాయన్నారు. తృణధాన్యాల విషయంలో రైతులకు చేసిన చెల్లింపులు పరిశీలిస్తే.. యూపీఏ హయాం కంటే 40రెట్లు పెరిగినట్లు వివరించారు.
పండిన పంటలను ఎగుమతి చేసుకునేందుకు ఇప్పటి వరకు ఉన్నవాటికి.. అదనంగా చేర్చి 22కు పెంచుతున్నట్లు వెల్లడించారు.
కనీస మద్దతు ధర విషయంలో కీలక మార్పులు చోటుచేసుకున్నాయి. పెట్టుబడి పెట్టిన దాని కంటే అన్ని పంట ఉత్పత్తులకు కనీసంగా ఒకటిన్నర రెట్లు ఎక్కువధర దక్కుతుంది. పంట సేకరణ కూడా రైతుల చెల్లింపులతో పాటే స్థిరంగా పెరుగుతోంది. అంతేకాకుండా ఈ ఏడాది రైతుల రుణవితరణ లక్ష్యాన్ని 16.5 లక్షల కోట్ల రూపాయలకు పెంచుతున్నాం.
--- నిర్మలా సీతారామన్, కేంద్ర ఆర్థికమంత్రి.
గ్రామీణాభివృద్ధి నిధులను రూ. 40వేల కోట్లకు పెంచుతున్నట్లు మంత్రి తెలిపారు. ఈ-నామ్ కింద మరో వె‌య్యి మండీలను చేర్చుతున్నట్లు పేర్కొన్నారు. విశాఖ ఫిషింగ్ హార్బర్ సహా దేశవ్యాప్తంగా 6 హార్బర్లను అభివృద్ధి చేయనున్నట్లు నిర్మల స్పష్టం చేశారు. పశుపోషణకు కూడా అధిక ప్రాధాన్యం ఇవ్వనున్నట్లు వివరించారు.
అగ్రీ ఇన్ఫ్రాస్ట్రక్చర్ అండ్ డెవెలప్మెంట్ సెస్(ఏఐడీసీ)
రైతుల ఆదాయం పెరిగేందుకు వ్యవసాయ మౌలిక వసతులు వృద్ధి చెందాల్సిన అవసరం ఉందన్నారు నిర్మల. ఈ క్రమంలో అగ్రీ ఇన్ఫ్రాస్ట్రక్చర్ అండ్ డెవెలప్మెంట్ సెస్(ఏఐడీసీ)ని ప్రతిపాదించారు. కమోడిటీస్ బట్టి 2.5శాతం- 100శాతం వరకు ఈ సెస్ వర్తిస్తుంది.
అయితే.. సెస్ను తీసుకొచ్చినప్పటికీ.. వినియోగదారుడిపై అధిక భారం పడకుండా ప్రభుత్వం చర్యలు తీసుకుందని ఆర్థికమంత్రి స్పష్టం చేశారు.
ఇదీ చూడండి:- పాత వాహనాల తగ్గింపునకు 'స్క్రాపింగ్ పాలసీ'
