ఉద్యోగుల భవిష్య నిధి సంస్థ (ఈపీఎఫ్ఓ) చందాదారులకు అందించే ఉద్యోగుల డిపాజిట్ లింక్డ్ ఇన్సూరెన్స్ (ఈడీఎల్ఐ) పరిహారం మొత్తాన్ని పెంచింది. ఈ పథకంలోని సభ్యులు ఏదైనా కారణంతో మరణిస్తే నామినీకి చెల్లించే కనీస బీమా మొత్తాన్ని రూ.2 లక్షల నుంచి 2.5 లక్షలకు, గరిష్టంగా రూ.6 లక్షల నుంచి రూ.7 లక్షలకు పెంచుతున్నట్లు ఇటీవల విడుదల చేసిన గెజిట్ నోటిఫికేషన్లో పేర్కొంది ఈపీఎఫ్ఓ.
ఈ ఏడాది ఏప్రిల్ 28 నుంచే పెంచిన బీమా మొత్తాలు వర్తించనున్నాయి. వచ్చే మూడేళ్ల వరకు ఈ మొత్తాలు కొనసాగనున్నట్లు తెలిపింది ఈపీఎఫ్ఓ.
ఈడీఎల్ఐ పథకం అంటే?
ఈపీఎఫ్ఓ చందాదారులైన ప్రైవేటు రంగంలోని ఉద్యోగులు అకాలంగా మరణిస్తే.. వారి కుటుంబాలకు ఆర్థిక భరోసా కల్పించే ఉద్దేశంతో ఈ పథకాన్ని తీసుకొచ్చింది కేంద్రం. 1976లో ఇది అమలులోకి వచ్చింది. ఈ పథకం ఈపీఎఫ్లోని క్రియాశీల చందాదారులందరికీ వర్తిస్తుంది.
ఈ బీమా పొందేందుకు ఉద్యోగులు ఎలాంటి ప్రీమియం చెల్లించాల్సిన అవసరం లేదు. ఉద్యోగి తరఫున ఆయా సంస్థలు నామమాత్రపు ప్రీమియం చెల్లిస్తే సరిపోతుంది.
ఈపీఎఎఫ్ చట్టం 1952 ప్రకారం.. ప్రైవేటు రంగ ఉద్యోగులందరికి ఈ పథకం తప్పనిసరి కాదు. ఈడీఎల్ఐ కన్నా ఎక్కువ కవరేజీనిచ్చే బీమా సదుపాయాన్ని కల్పించే సంస్థలు ఈ పథకాన్ని వర్తింపజేయాల్సిన అవసరం లేదు. ఈ కారణంగానే చాలా సంస్థలు ఈడీఎల్ఐకి బదులు టర్మ్ ఇన్సూరెన్స్ను అందిస్తాయి.
ఓ అంచనా ప్రకారం.. దేశవ్యాప్తంగా 5 కోట్లకుపైగా క్రియాశీల ఈపీఎఫ్ చందాదారులు ఉంటే.. అందులో 20 లక్షల మంది మాత్రమే ఈడీఎల్ఐ పరిధిలో ఉన్నట్లు తెలిసింది.
ఈడీఎల్ఐ ఎలా పని చేస్తుంది?
రూ.15,000 కన్నా తక్కువ బేసిక్ శాలరీ వచ్చే ఉద్యోగులు ఈ పథకానికి అర్హులు.
ఈ పథకం వర్తించాలంటే.. ఉద్యోగి బేసిక్ శాలరీలో నెలకు 0.5 శాతం లేదా గరిష్ఠంగా 75 రూపాయలను సంస్థ ప్రీమియంగా చెల్లించాల్సి ఉంటుంది.
ఈ పథకంలో సభ్యులైన ఉద్యోగులు అకాలంగా మరణిస్తే.. బీమా మొత్తాన్ని నామినీకి అందిస్తారు. ఎంత మొత్తం ఇవ్వాలనేది.. ఉద్యోగి వేతనం, అలవెన్సులు, ఈపీఎఫ్ ఖాతాలోని నెలవారీ సగటు మొత్తం ఎంత? అనే అంశాలపై ఆధారపడి ఉంటుంది.
ఎవరైన ఉద్యోగి నామినీని ఎంపిక చేసి ఉండకపోతే.. న్యాయపరమైన వారసులు, కుటుంబ సభ్యులు బీమాను క్లెయిమ్ చేసుకోవచ్చు. ఉద్యోగి మరణానికి ముందు కనీసం 12 నెలలు విధులు నిర్వహించి ఉండాలి.
ఇవీ చదవండి:
