భారత ఈ-కామర్స్ మార్కెట్లో రోజురోజుకు పోటీతత్వం తీవ్రమవుతోంది. అయినప్పటికీ భారతీయ కంపెనీలు.. విదేశీ కంపెనీల పోటీని తట్టుకుని(కార్యకలాపాలు, సుస్థిరత్వం విషయంలో).. ముందుకు సాగే అవకాశాలున్నాయని ఈ-కామర్స్ మార్కెట్ విశ్లేషకులు కిరణ్ పేడాడ అంటున్నారు. హైదరాబాద్ ఇండియన్ స్కూల్ ఆఫ్ బిజినెస్ (ఐఎస్బీ)లో కిరణ్ మార్కెటింగ్ విభాగ అసిస్టెంట్ ప్రొఫెసర్.
అమెజాన్, వాల్మార్ట్ లాంటి దిగ్గజ బహుళజాతీయ సంస్థలకూ భారత మార్కెట్లో పోటీని తట్టుకోవడం అంత సులువేం కాదని.. కిరణ్ 'ఈటీవీ భారత్'తో చెప్పారు. ఆయా కంపెనీలకు ఎంతో అనుభవమున్నప్పటికీ.. ఇతర మార్కెట్లతో పోలిస్తే భారత్లో క్లిష్టమైన పరిస్థితులు ఎదుర్కొనాల్సి ఉంటుందన్నారు.
'ఈ-కామర్స్ కంపెనీలు ఇప్పుడు చిన్న చిన్న పట్టణాలపైనే ప్రధానంగా దృష్టి పెడుతున్నాయి. దీని వల్ల విదేశీ కంపెనీలకు భాష, లాజిస్టిక్స్, మౌలికవసతులు సహా అనేక విషయాల్లో సవాళ్లు ఎదురు కావచ్చు' అని కిరణ్ వివరించారు. దేశీయ కంపెనీలకు మాత్రం ఇది కలిసివచ్చే అంశమని చెప్పుకొచ్చారు. రిలయన్స్, టాటా వంటి సంస్థలు దేశవ్యాప్తంగా ఎన్నో దశాబ్దాలుగా తమ వ్యాపారాలు సాగిస్తుండటమే ఇందుకు కారణమన్నారు.
టాటా కొత్త ఈ-కామర్స్ యాప్!
టాటా గ్రూప్ ఇటీవల ఈ-గ్రోసరీ విభాగంలోకి ప్రవేశించిన నేపథ్యంలో దేశవ్యాప్తంగా ఈ-కామర్స్ వ్యాపారాల్లో తీవ్ర పోటీకి తెరలేపినట్లు వస్తున్న వార్తలకు.. కిరణ్ విశ్లేషణతో మరింత ప్రాధాన్యం ఏర్పడింది.
ప్రముఖ ఈ-కామర్స్ సంస్థ.. బిగ్ బాస్కెట్లో 64.3 శాతం వాటాను కొనుగోలు చేసే ప్రణాళికకు అనుమతి కోరుతూ కాంపిటీషన్ కమిషన్ ఆఫ్ ఇండియా (సీసీఐ)కి గత వారం దరఖాస్తు చేసుకుంది టాటా గ్రూప్. దీనితో పాటు టాటా డిజిటల్ లిమిటెడ్ నుంచి త్వరలో సరికొత్త ఈ కామర్స్ యాప్ రానున్నట్లు వార్తలొస్తున్నాయి.
భారత్లో ఈ-కామర్స్ కంపెనీలు
ప్రస్తుతం భారత ఈ-కామర్స్ విభాగంలో అమెజాన్(అమెరికాకు చెందిన అమెజాన్ ఇంక్ దీని మాతృసంస్థ), ఫ్లిప్కార్ట్(అమెరికాకు చెందిన వాల్మార్ట్ దీని మాతృసంస్థ), భారతీయ కంపెనీ జియో మార్ట్ (ముకేశ్ అంబానీ నేతృత్వంలోని రిలయన్స్ ఇండస్ట్రీస్ అనుబంధ సంస్థ) ప్రధానంగా ఉన్నాయి.
ప్రపంచ ఈ-కామర్స్ మార్కెట్లో అమెజాన్ అగ్రస్థానంలో ఉండగా, ఆఫ్లైన్ రిటైల్ మార్కెట్లో వాల్మార్ట్ ప్రథమ స్థానంలో ఉండటం గమనార్హం.
పాలసీల అడ్డంకులకు..
ప్రస్తుతమున్న పాలసీలు, నిబంధనలు కూడా విదేశీ ఈ-కామర్స్ సంస్థలకు అంత అనుకూలమైనవేం కాదని కిరణ్ అభిప్రాయపడ్డారు.
"దేశంలో ఇప్పుడు రెండు ఈ-కామర్స్ విధానాలు ఉన్నాయి. ఒకటి మార్కెట్ ప్లేస్ విధానం, రెండోది ఇన్వెన్టరీ విధానం. మార్కెట్ ప్లేస్ విధానం 100 శాతం ఎఫ్డీఐకు అనుమతిస్తుంటే.. రెండో విధానంలో అందుకు అనుమతి లేదు. ఇదే విదేశీ ఈ-కామర్స్ కంపెనీలకు ప్రధాన అవరోధం" అని కిరణ్ పేర్కొన్నారు.
ఇన్వెన్టరీ విధానంలో ఈ-కామర్స్ సంస్థలు తమ సొంత ఉత్పత్తులను విక్రయించేందుకు అనుమతి ఉన్నప్పటికీ.. కొనుగోలుదారు, విక్రేతల మధ్య అనుసంధానకర్తగా మాత్రమే వ్యవహరించాల్సి ఉంటుంది.
కొత్త ఈ-కామర్స్ పాలసీ..
విశ్వసనీయ వర్గాల ప్రకారం.. సరికొత్త ఈ-కామర్స్ పాలసీ రూపకల్పనకు సంబంధిత వర్గాలతో వాణిజ్యమంత్రిత్వ శాఖ చర్చలు ప్రారంభించినట్లు తెలుస్తోంది. ప్రస్తుతానికి దేశంలో ఈ-కామర్స్ రంగానికి ఏకీకృత పాలసీ లేకపోవడమే ఇందుకు కారణంగా తెలుస్తోంది.
ఆదాయపు పన్ను చట్టం 1961, వినియోగదారు హక్కుల రక్షణ చట్టం 2019, ఇన్ఫర్మేషన్ టెక్నాలజీ చట్టం 2000, ఫారిన్ ఎక్ఛేంజ్ మేనేజ్మెంట్ యాక్ట్ 2000.. వంటి చట్టాల పరిధిలో ప్రస్తుతం ఈ-కామర్స్ విభాగం ఉంది.
ఇదీ చదవండి:'డిజిటల్ మోసాలకు టెక్నాలజీతో కళ్లెం'
