సంక్షిప్త సందేశాల యాప్లు.. వాట్సాప్, టెలిగ్రామ్ ప్రస్తుతం ఎండ్ టూ ఎండ్ ఎన్క్రిప్షన్(పంపిన వారు, అందుకున్న వారికి మాత్రమే కనిపించే సాంకేతికత) రక్షణను కల్పిస్తున్నాయి. ఈ కారణంగా వీటి వాడకం పూర్తిగా సురక్షితం అని మీరు నమ్ముతున్నారా? అయితే మీరు మీ నిర్ణయాన్ని పునరాలోచించుకోక తప్పదు. ఎందుకంటే సైబర్-సెక్యూరిటీ సంస్థ 'సిమాంటెక్' పరిశోధకులు సంచలన విషయాలు బయటపెట్టారు. వాట్సాప్, టెలిగ్రామ్ ఆండ్రాయిడ్ వర్షన్లలో లోపాలు ఉన్నట్లు తెలిపారు.
'మీడియా ఫైల్ జాకింగ్' రక్షణ వ్యవస్థలో లోపం కారణంగా ఆండ్రాయిడ్ వాట్సాప్, ఆండ్రాయిడ్ టెలిగ్రామ్లలో ఈ హ్యాకింగ్లు జరగొచ్చని పరిశోధకులు తమ బ్లాగ్లో వెల్లడించారు.
పరిశోధన ప్రకారం.. వాట్సాప్ ఆటోమేటిక్గా ఫైళ్లను బాహ్య స్టోరేజీలో పొందుపరుస్తోంది. అదే విధంగా ఆండ్రాయిడ్ టెలిగ్రామ్ 'సేవ్ టూ గ్యాలరీ' ఫీచర్ను ఎనేబుల్ చేయడం ద్వారా ఫైళ్లను ఫోన్ మెమోరిలోకి సేవ్ చేస్తోంది.
అయితే తాజాగా గుర్తించిన లోపం కారణంగా... సైబర్ దాడులకు పాల్పడే హ్యాకర్లు ఆయా యాప్ల నుంచి బదిలీ అయ్యే వ్యక్తిగత సమాచారం, ఫోటోలు, వీడియోలు, డాక్యుమెంట్లు, ఇన్వాయిస్లు ఇలా అన్నింటిని దుర్వినియోగం చేసే అవకాశం ఉందని పేర్కొన్నారు.
యాప్ డౌన్లోడ్ చేసుకుని వాడుతున్నప్పుడు.. యూజర్లకు తెలియకుండానే ఆ యాప్లలో బదిలీ అయ్యే సమాచారాన్ని హ్యాకర్లు చూడగలుగుతారని పేర్కొన్నారు. ఇలా ఒక వ్యక్తి మరో వ్యక్తికి ఫోటోలు పంపినప్పుడు... పంపిన వ్యక్తికి తెలియకుండానే ఆ ఫోటోలను మార్చి పంపించే అవకాశం ఉందని తెలిపారు. అదే విధంగా ఏమైనా కొనుగోళ్లు జరిపినప్పుడు పంపించే ఇన్వాయిస్ డాక్యుమెంట్లు, ఆడియో ఫైళ్లను తప్పుదోవ పట్టించి తప్పుడు సమాచారాన్ని చేరవేసే అవకాశం ఉందని తెలిపారు.
ఇంతకు ముందు కూడా వాట్సాప్ ఆడియో కాల్ ఫీచర్లో లోపం ఉన్నట్లు ఇజ్రాయెల్కు చెందిన సైబర్ ఇంటెలిజెన్స్ సంస్థ ఎన్ఎస్ఓ గ్రూప్ వెల్లడించింది. దీని ద్వారా హ్యాకర్లు స్పై వేర్లను పంపించి డేటా చౌర్యానికి పాల్పడే అవకాశం ఉందని వెల్లడించారు. అయితే ఈ బగ్ను గుర్తించిన వాట్సాప్ వెంటనే దానిని పరిష్కరించినట్లు తెలిపింది.
ఇదీ చూడండి: అదిరే ఫీచర్లతో రియల్మీ కొత్త మోడళ్లు
