భారత్లో 50 మిలియన్ల చిన్న, మధ్య తరహా అంకురాలకు ప్రోత్సాహమందించే దిశగా 'వాట్సాప్' అడుగులు వేస్తోంది. ఐదు ఉత్తమ భారత అంకుర సంస్థలకు రూ.35 లక్షల చొప్పున ప్రోత్సాహం అందించనున్నట్లు ప్రకటించింది 'వాట్సాప్'.
వాట్సాప్ నూతన అధినేత విల్ క్యాత్కర్ట్ భారత పర్యటనలో భాగంగా గురువారం అంకురాల ప్రోత్సహకాలపై కీలక ప్రకటన చేయనున్నారు.
'గేట్ వే టు బిలియన్ ఆపర్చునిటీస్' పేరుతో గురువారం ఓ సమావేశాన్ని నిర్వహించనున్నారు విల్ క్యాత్కర్ట్. ఇందులో నీతి ఆయోగ్ సీఈఓ అమితాబ్ కాంత్ కూడా పాల్గొననున్నారు. ఈ కార్యక్రమంలోనే చిన్న, మధ్య తరహా అంకురాలకు సంబంధించిన ప్రణాళికను ప్రకటించే అవకాశం ఉంది.
గత ఏడాది జనవరిలో ఆవిష్కరించిన ' వాట్సాప్ బిజినెస్ యాప్'పై ప్రస్తుతం భారీ ఎత్తున కసరత్తు చేస్తోంది ఈ సంక్షిప్త సందేశాల దిగ్గజం. చిన్న, మధ్య తరహా అంకురాలకు, వాటి వినియోగదారులకు పరస్పర సమాచార మార్పిడి కోసం ఈ యాప్ను తీసుకువచ్చింది వాట్సాప్.
అంకురాలతో చర్చలు
వాట్సాప్ నుంచి చిన్న, మధ్య తరహా అంకురాలకు ఎలాంటి మార్గదర్శకాలు అవసరం అనే అంశంపై ముంబయిలో ఓ కార్యక్రమం నిర్వహించనున్నారు విల్ క్యాత్కర్ట్. ఇందులో పలు చిన్న, మధ్య తరహా అంకురాల ప్రతినిధులతో చర్చించనున్నారు.
ఒక సాధారణ డెవలపర్ నుంచి దిగ్గజ సంస్థల్లో ఒకటైన 'వాట్సాప్' అధినేతగా ఎదిగిన క్యాత్కర్ట్ తన అనుభవాలను పంచుకోనున్నారు.
ఇదీ చూడండి: 'ఉల్లంఘన' కేసులో అనిల్ అంబానీకి ఊరట
