టాటా గ్రూప్నకు చెందిన ప్రముఖ విమానయాన సంస్థ విస్తార ఉద్యోగుల వేతనాలపై కీలక నిర్ణయం తీసుకుంది. లాక్డౌన్లో ఆదాయం తగ్గిన కారణంగా ఈ ఏడాది చివరి వరకు వేతనాల్లో 5-20 శాతం కోత విధించనున్నట్లు వెల్లడించింది. దాదాపు 40 శాతం ఉద్యోగులపై వేతనాల కోత ప్రభావం పడనున్నట్లు తెలిపింది. మిగత 60 శాతం ఉద్యోగుల వేతనాలపై ప్రభావం ఉండదని పేర్కొంది.
విస్తారలో ప్రస్తుతం 4,000 మంది ఉద్యోగులున్నారు.
సీఈఓ వేతనం 20 శాతం కోత..
'జులై 1 నుంచి డిసెంబర్ 31 వరకు నెలవారీ వేతనాల్లో కోత అమలు చేయనున్నాం. వ్యక్తిగతంగా నేను 20 శాతం వేతనం తగ్గించుకోనున్నాను. పైలట్లు మినహా మిగత సిబ్బందిపై వేతనాల కోత ప్రభావం పడనుంది' అని ఉద్యోగులకు పంపిన ఈ-మెయిల్లో విస్తార సీఈఓ లెస్లీ థంగ్ పేర్కొన్నారు. పైలట్లకు ఫ్లయింగ్ అలవెన్సుల్లో తగ్గింపు ఉంటుందని అందులో తెలిపారు.
వేతనాల కోతలు ఇలా..
లెవల్ 5,4 స్థాయి ఉద్యోగుల వేతనాల్లో 15 శాతం, లెవల్ 3,2, లైసెన్స్ ఉన్న లెవల్ 1సీ ఇంజినీర్ల జీతాల్లో 10 శాతం కోత విధించనుంది విస్తార. లెవల్ 1 ఉద్యోగులు, రూ.50,000 అంత కన్నా ఎక్కువ వేతనం ఉన్న వారికి 5 శాతం కోత విధించనున్నట్లు తెలిపింది.
విమానాలు నడుపుతున్నా లాభాలు లేవు..
లాక్డౌన్ సడలింపులతో విమాన సేవలు ప్రారంభమైనా.. 30 శాతం కన్న తక్కువ కార్యకలాపాలు కొనసాగుతున్నట్లు విస్తార వెల్లడించింది. ప్రయాణికుల రద్దీ కూడా లాక్డౌన్ ముందుతో పోలిస్తే భారీగా తగ్గినట్లు తెలిపింది. డిమాండ్ లేనందున ఆర్థికంగా ఇంకా ఇబ్బందులు తప్పడం లేదని పేర్కొంది విస్తార.
ఇదీ చూడండి:ఇప్పటికే ఇన్స్టాల్ చేసిన చైనా యాప్లు పనిచేస్తాయా?
