కార్ల తయారీ దిగ్గజం టొయోటా ఎగిరే ఎలక్ట్రిక్ కార్ల వాణిజ్య ఉత్పత్తిపై దృష్టి పెట్టింది. వేగవంతమైన, సౌకర్యవంతమైన, అందుబాటు ధరల్లో గగనతల ప్రయాణం కోసం 400 మిలియన్ డాలర్ల పెట్టుబడులు పెట్టనున్నట్లు ప్రకటించింది.
గగనతల ప్రయాణం.. టొయోటా దీర్ఘకాలిక లక్ష్యమన్న ఆ సంస్థ అధ్యక్షుడు అకియో టొయోడా ఆటోమోబైల్ వ్యాపారం కొనసాగిస్తూనే, ఎగిరేకార్ల ఉత్పత్తిపై దృష్టిసారిస్తామన్నారు. ఈ పెట్టుబడుల ద్వారా వినియోగదారులు భూమి మీదే కాకుండా నింగిలోనూ స్వేచ్ఛగా ఎగిరే అవకాశం కల్పిస్తామని టొయోటా వెల్లడించింది.
2009లో నాలుగు సీట్ల ఎలక్ట్రిక్ ఎయిర్‌ క్రాఫ్ట్ను తయారు చేసిన టొయోటా వాటిని వ్యక్తులకు అమ్మే బదులుగా వాణిజ్య రవాణావ్యవస్థగా మలిచేందుకు ఆసక్తి చూపుతోంది. ప్రపంచపు అతిచిన్న ఫ్లైయింగ్‌ కార్‌ తయారు చేసేందుకు జపనీస్‌ స్కైడ్రైవ్‌ ప్రాజెక్టులో భాగస్వామిగా చేరిన టొయోటా ఇతర రంగాల్లోకీ ప్రవేశిస్తోంది. హైడ్రోజెన్ ఫ్యూయల్ సెల్స్‌, స్వయం చాలిత వాహనాలు, స్మార్ట్‌ గృహాల నిర్మాణాల్లోనూ టొయోటా పెట్టుబడులు పెడుతోంది.
