దేశీయ ఐటీ దిగ్గజం టాటా కన్సల్టెన్సీ సర్వీసెస్ (టీసీఎస్) మరో ఘనత సాధించింది. బ్రాండ్ విలువ పరంగా ప్రపంచంలో అత్యంత విలువైన ఐటీ సంస్థల్లో మూడో ర్యాంకును దక్కించుకుంది.
'బ్రాండ్ విలువ 11 శాతం వృద్ధితో 15 బిలియన్లు డాలర్లకు చేరడం వల్ల ఐబీఎంతో పోలిస్తే స్వల్ప తేడాతో మూడో స్థానంలో నిలిచింది టీసీఎస్.' అని 'గ్లోబల్ 500-2021' పేరుతో బ్రాండ్ ఫినాన్స్ విడుదల చేసిన నివేదిక పేర్కొంది.
ఈ జాబితాలో 26 బిలియన్ డాలర్ల బ్రాండ్ విలువతో యాక్సెంచర్ అగ్రస్థానాన్ని నిలబెట్టుకుంది. ఐబీఎం 16.1 బిలియన్ డాలర్ల బ్రాండ్ విలువతో రెండో స్థానాన్ని కొనసాగించింది.
'బ్రాండ్ వ్యాల్యూ' అనేది ప్రస్తుత ఆదాయాల విలువను సూచిస్తుందని పేర్కొంది బ్రాండ్ ఫినాన్స్.
దేశీయ ఐటీ దిగ్గజాలైన ఇన్ఫోసిస్, హెచ్సీఎల్, విప్రోలు కూడా ప్రపంచవ్యాప్తంగా టాప్ 10 ఐటీ కంపెనీల జాబితాలో చోటు దక్కించుకోవడం విశేషం. ఈ సంస్థలన్నీ వేగంగా వృద్ధి చెందుతున్నట్లు నివేదిక వివరించింది.
ఇతర సంస్థల ర్యాంకులు
కాగ్నిజెంట్ను దాటి ఇన్ఫోసిస్ 4వ స్థానానికి చేరింది. ఇన్ఫీ బ్రాండ్ వ్యాల్యూ 19 శాతం వృద్ధితో 8.4 బిలియన్ డాలర్లకు ఎగబాకింది.
హెచ్సీఎల్ టెక్ 7వ స్థానాన్ని దక్కించుకుంది. విప్రో 9వ స్థానంలో ఉంది. టెక్ మహీంద్రా 11వ స్థానంతో సరిపెట్టుకుంది.
ఇదీ చూడండి:భారత్లో కార్యకలాపాలకు 'టిక్టాక్' గుడ్బై
