లగ్జరీ గాడ్జెట్స్ తయారీ సంస్థ యాపిల్ ఈ ఏడాది ఏప్రిల్-జూన్ త్రైమాసికంలో 81.4 బిలియన్ డాలర్ల (రూ.6.05 లక్షల కోట్లు) ఆదాయాన్ని గడించింది. 2020 ఇదే సమయంలో సంస్థ ఆదాయం 56.9 బిలియన్ డాలర్లుగా ఉంది.
గడిచిన మూడు నెలల కాలంలో సంస్థ నికర ఆదాయం 21.7 బిలియన్ డాలర్లు(రూ.1.6 లక్షల కోట్లు)గా నమోదవగా.. గత ఏడాది ఇదే సమయంలో ఈ మొత్తం 11.2 బిలియన్ డాలర్లుగా ఉన్నట్లు వెల్లడించింది యాపిల్.
మొత్తం ఆదాయంలో ఐఫోన్ల వాటానే.. 39.5 బిలియన్ డాలర్లని(రూ.2.9 లక్షల కోట్ల పైమాటే) యాపిల్ పేర్కొంది.
అన్ని విభాగాల్లో, అన్ని మార్కెట్లలోను కంపెనీ మంచి ప్రదర్శన కనబర్చి.. రెండంకెల వృద్ధిని నమోదు చేసిందని యాపిల్ సీఈఓ టిమ్ కుక్ పేర్కొన్నారు. కొత్తగా పుంజుకుంటున్న మార్కెట్లలోనూ.. యాపిల్ ఉత్పత్తులు, సేవలకు డిమాండ్ పెరిగినట్లు చెప్పారు.
మరిన్ని వివరాలు..
ఏప్రిల్-జూన్ త్రైమాసిక ఆదాయంలో (81.4 బిలియన్ డాలర్ల) అమెరికా వాటానే 35.8 బిలియన్ డాలర్లు కావడం గమనార్హం. ఐరోపా మార్కెట్ నుంచి 18.9 బిలియన్ డాలర్లు గడించింది యాపిల్. చైనా మార్కెట్లో 14.7 బిలియన్ డాలర్లు, జపాన్లో 6.4 బిలియన్ డాలర్ల ఆదాయాన్ని నమోదు చేసింది. ఆసియా ప్రాంతంలోని మిగతా మార్కెట్ల నుంచి 5.3 బిలియన్ డాలర్ల ఆదాయాన్ని ఆర్జించింది.
ఇదీ చదవండి:ఏ వస్తువుకు ఎంత ధర? కంపెనీల ఇష్టమేనా?
