బకాయిలు తిరిగి రాబట్టుకోవడం కోసం విజయ్ మాల్యాకు చెందిన ఆస్తులను విక్రయించేందుకు బ్యాంకుల కన్సార్టియానికి ముంబయి ప్రత్యేక కోర్టు అనుమతి మంజూరు చేసింది. ఈడీ సీజ్ చేసిన ఆస్తులను పునరుద్ధరించాలని మాల్యాకు రుణాలు ఇచ్చిన 11 బ్యాంకులు న్యాయస్థానాన్ని ఆశ్రయించాయి. దీనిపై విచారణ చేపట్టిన మనీలాండరింగ్ నిరోధక కోర్టు.. బ్యాంకుల అభ్యర్థనకు న్యాయస్థానం సానుకూలంగా స్పందించింది. రూ.5,646.54 కోట్ల విలువైన మాల్యా ఆస్తులను విక్రయించేందుకు అనుమతించింది.
2002 సర్ఫేసీ చట్టం ప్రకారం రికవరీ ప్రక్రియ కొనసాగనుంది. మార్గదర్శకాల ప్రకారం త్వరలోనే ఆస్తుల వేలం నిర్వహిస్తామని అధికారులు తెలిపారు.
సుమారు రూ.9 వేల కోట్లను బ్యాంకులకు ఎగ్గొట్టి లండన్ పారిపోయారు విజయ్ మాల్యా. ఇందులో ఎస్బీఐ వాటా అత్యధికంగా రూ.1,600 కోట్లు ఉంది. పీఎన్బీ, ఐడీబీఐ బ్యాంకులకు రూ.800 కోట్ల చొప్పున రావాల్సి ఉంది. బ్యాంక్ ఆఫ్ ఇండియా(రూ. 650 కోట్లు), బ్యాంక్ ఆఫ్ బరోడా(రూ.550 కోట్లు), సెంట్రల్ బ్యాంక్ ఆఫ్ ఇండియా(రూ. 410 కోట్లు)కు మాల్యా బకాయి పడ్డారు.
ఇదీ చదవండి- విజయ్ మాల్యాకు కోర్టులో మరో ఎదురుదెబ్బ
