దేశవ్యాప్తంగా బ్యాంకింగ్ సేవలకు నేడు పాక్షికంగా అంతరాయం కలిగే అవకాశముంది. ప్రభుత్వరంగ బ్యాంకుల విలీనానికి వ్యతిరేకిస్తూ.. అఖిల భారత బ్యాంకు ఉద్యోగుల సంఘం(ఏఐబీఈఏ), భారత బ్యాంకు ఉద్యోగుల సమాఖ్య (బీఈఎఫ్ఐ) సమ్మెకు పిలుపునివ్వడమే ఇందుకు కారణం. రిజర్వు బ్యాంకు, ఎస్బీఐ ఉద్యోగులు, ప్రాంతీయ గ్రామీణ బ్యాంకులు, సహకార బ్యాంకుల ఉద్యోగులు సమ్మెకు దూరంగా ఉండనున్నారు.
ఇటీవల జరిగిన ప్రభుత్వ బ్యాంకుల విలీనం ద్వారా డిపాజిట్ రేటు తగ్గిందని.., అనేక మంది ఉద్యోగాలు, పదోన్నతులు కోల్పోయే అవకాశం ఉందని ఏఐబీఈఏ, బీఈఎఫ్ఐ చెబుతున్నాయి. బ్యాంకింగ్ రంగ కష్టాలు తీర్చేందుకు ఎగవేతదారుల నుంచి రుణాలు వసూలు చేస్తే సరిపోతుందని.. దానికోసం విలీనం చేయాల్సిన పని లేదని బ్యాంకు సంఘాలు అంటున్నాయి. సంస్కరణల పేరిట సామాన్య వినియోగదారులపై అధిక సర్వీస్‌ ఛార్జీలు వేసే ప్రయత్నం చేస్తున్నారని ఆరోపించాయి. గతనెల 26 నుంచి 27నే సమ్మె చేయాలని పిలుపునిచ్చినా.. చివరి నిమిషంలో సమ్మెను వాయిదా వేశాయి.
డిమాండ్లు ఇవే..
- బ్యాంకుల విలీనం ఉపసంహరణ
- సత్వర వేతన సవరణ
- వారానికి ఐదురోజుల పనిదినాల అమలు
- విజిలెన్స్ కేసుల్లో బయటి సంస్థల జోక్యాన్ని నిలిపివేయడం
- ఎన్పీఎస్ స్థానంలో పాత పెన్షన్‌ విధానం అమలు
- సేవా ఛార్జీలు తగ్గింపు
- మొండి బకాయిలు వసూలు చేసేందుకు కఠిన చర్యలు
బ్యాంకుల విలీన ప్రతిపాదన ఇలా..
ప్రస్తుతం నెలకొన్న ఆర్థిక మాంద్యాన్ని ఎదుర్కొనేందుకు బ్యాంకుల విలీనం ప్రతిపాదనను తెరపైకి తెచ్చింది కేంద్రం. ఇందులో భాగంగా పంజాబ్ నేషనల్ బ్యాంకులో.. ఓరియంటల్ బ్యాంక్ ఆఫ్ కామర్స్, యునైటెడ్ బ్యాంక్ ఆఫ్ ఇండియాలను కలపి రెండో అతిపెద్ద ప్రభుత్వ బ్యాంకుగా మార్చాలని నిర్ణయించింది.
- కెనరా బ్యాంకులో.. సిండికేట్ బ్యాంక్ను విలీనం చేయాలని ప్రతిపాదించింది. ఇదే జరిగితే కెనరా బ్యాంకు 4వ అతిపెద్ద ప్రభుత్వ రంగ బ్యాంకుగా అవతరిస్తుంది.
- యూనియన్ బ్యాంకులో.. ఆంధ్రా బ్యాంకు, కార్బొరేషన్ బ్యాంకులను విలీనం చేయాలని ప్రభుత్వం యోచిస్తోంది. ఈ విలీనం పూర్తయితే యూనియన్ బ్యాంక్ 5వ అతిపెద్ద ప్రభుత్వ రంగ బ్యాంకుగా తయారవుతుంది.
- ఇక ఇండియన్ బ్యాంకులో.. అలహాబాద్ బ్యాంకును విలీనం చేయాలని ప్రభుత్వ ప్రతిపాదన. ఈ విలీనం పూర్తయితే దేశంలో 7వ అతిపెద్ద ప్రభుత్వ రంగ బ్యాంకుగా ఇండియన్ బ్యాంకు అవతరిస్తుంది.
- ప్రభుత్వం ప్రతిపాదించినట్లుగానే బ్యాంకుల విలీనం పూర్తయితే దేశంలో మొత్తం 12 ప్రభుత్వ రంగ బ్యాంకులు మాత్రమే ఉండనున్నాయి.
