సంస్థ ఉద్యోగుల ముందు ఓ ప్రతిపాదన ఉంచింది అమెజాన్. "ఉద్యోగం మానేయండి.. సొంత వ్యాపారం ప్రారంభించేందుకు ఆర్థిక సాయం చేస్తాం" అని ప్రకటించింది. అమెజాన్ ఆర్డర్లను వినియోగదారులకు చేరవేడమే ఆ వ్యాపారం.
కారణమిదే..
ఆర్డర్లను వినియోగదారులకు మరింత వేగంగా అందించాలని అమెజాన్ ప్రయత్నిస్తోంది. ప్రైమ్ సభ్యులకు ప్రస్తుతం రెండు రోజుల్లోగా వస్తువులను డెలివరీ చేస్తోంది. ఒకరోజులోనే ఆ ప్రక్రియ పూర్తి చేయాలని భావిస్తోంది. ఎక్కువ డెలివరీలు చేసిన వారికి అదనపు ప్రోత్సాహకాలు ఇవ్వాలని అమెజాన్ యోచిస్తోంది.
10వేల డాలర్లు...
ఉద్యోగం మానేసి అమెజాన్ ఉత్పత్తుల డెలివరీ వ్యాపారం చేయాలనుకునేవారికి 10వేల డాలర్ల వరకు ఆర్థిక సాయం చేస్తామని ప్రకటించింది ఆ సంస్థ. మూడు నెలల వేతనాన్నీ చెల్లించనుంది. ఫుల్టైమ్, పార్ట్టైమ్ ఉద్యోగులతో పాటు ఆర్డర్లను ప్యాక్ చేసి, వినియోగదారులకు అందించే వేర్హౌస్ ఉద్యోగులు ఈ సదుపాయాన్ని వినియోగించుకోవచ్చని తెలిపింది అమెజాన్.
ఎంత మంది ఉద్యోగులు ఈ ప్రతిపాదనను అంగీకరిస్తారనే అంచనాలను చెప్పేందుకు ఆ సంస్థ నిరాకరించింది.
ఎవరైనా దరఖాస్తు చేసుకోవచ్చు
అమెజాన్ డెలివరీ వ్యాపారం ప్రారంభించేందుకు ఆసక్తిగల వారెవరైనా దరఖాస్తు చేసుకోవచ్చని అమెజాన్ ప్రకటించింది. ఆర్డర్లను వినియోగదారులకు అందించేందుకు పోస్టాఫీసులు, పార్సిల్ సర్వీసులపై ఆధారపడకూడదని భావిస్తోంది ఆ సంస్థ. అందుకే ఈ కార్యక్రమం చేపట్టింది.
