కరోనా ప్రభావం ఎయిర్ఏసియా పైలట్లపై పడింది. మే, జూన్ నెలల్లో పైలట్ల జీతాల్లో 40 శాతం కోత విధించింది సంస్థ. అయితే సీనియర్ మేనేజర్లు సహా మిగతా ఉద్యోగులకు ఏప్రిల్ నెలలో ఇచ్చిన వేతనాలనే అందించింది. సీనియర్ మేనేజర్లకు ఏప్రిల్ నెల జీతాల్లో 20 శాతం కోత విధించిన సంస్థ.. ఇతర ఉద్యోగులకు 7నుంచి 17 శాతం కోత విధించింది. అయితే నెలకు రూ. 50,000 అంతకంటే తక్కువ జీతాలను పొందుతున్న ఉద్యోగులను ఈ కోత నుంచి మినహాయించారు.
జూనియర్ పైలట్ల జీతాన్ని రూ. 1.40 లక్షల నుంచి రూ. 40వేలకు తగ్గించగా.. సీనియర్ పైలట్కు రూ. 3.45 లక్షల నుంచి రూ. లక్షకు తగ్గించారు. పైలట్ మొత్తం జీతంలో కోతపడిన వేతనం 40 శాతంగా ఉంటుందని ఎయిర్ ఏసియా అధికారులు వెల్లడించారు.
'రానున్న రోజుల్లో కొత్త సర్వీసులు కష్టమే'
2021 మార్చి నాటికి ఐదు ఏ320 సర్వీసులను నడపాలని లక్ష్యించిన ఎయిర్ ఏసియా.. ప్రస్తుత కరోనా కాలంలో వాటిని పునఃసమీక్షించింది. ప్రస్తుతానికి విమానాల పెంపు అంశాన్ని వాయిదా వేసినట్లు తెలిపింది.
టాటా-ఎయిర్ ఏసియాల సంయుక్త భాగస్వామ్యంలో నడిచే ఎయిర్ ఏసియా ఇండియా క్యారియర్ వచ్చేవారం ఆరు సంవత్సరాలను పూర్తిచేసుకోనుంది. ఈ సంస్థకు 2500మంది ఉద్యోగులు ఉన్నారు.
ఇదీ చూడండి: దిగ్గజ కంపెనీల రేటింగ్పై మూడీస్ దెబ్బ
