గంటలోనే లోన్! సూక్ష్మ, చిన్న, మధ్య తరహా పరిశ్రమల కోసం కేంద్రప్రభుత్వం ప్రారంభించిన కార్యక్రమమిది. ఇందుకోసం గతేడాది నవంబర్లో "PSBloansin59minutes.com" పేరిట ఆన్లైన్ రుణ సంస్థను ప్రారంభించారు ప్రధాని నరేంద్రమోదీ. తొలి 3 నెలల్లోనే రూ.35,000 కోట్లకు పైగా రుణాలు మంజూరు చేసింది ఈ సంస్థ. దేశంలోనే అతిపెద్ద ఫిన్టెక్ లెండింగ్ ప్లాట్ఫాంగా నిలిచింది.
కేంద్ర ఆర్థిక కార్యకలాపాల కార్యదర్శి రాజీవ్ కుమార్ నేతృత్వంలో ఈ ప్లాట్ఫాంను రూపొందించారు. ఎంఎస్ఎంఈలకు రుణాల మంజూరుకు ఇంతకుముందు 20-25 రోజులు పట్టేది. ఇప్పుడు 59 నిమిషాలు లేదా గంటలోపే రుణాల మంజూరు ప్రక్రియ పూర్తవుతోంది. ఇలా మంజూరైన రుణాల మొత్తం 7-8 పని దినాల్లో లబ్ధిదారులకు చేరుతున్నాయి.
రుణాల ముంజూరు ప్రక్రియను సులభంగా, వేగంగా, పారదర్శకంగా నిర్వహించడమే ఈ ప్లాట్ఫాం ముఖ్య ఉద్దేశమని వివరించారు రాజీవ్ కుమార్.
"PSBloansin59minutes.com" ప్రారంభమైనప్పుటి నుంచి ఇప్పటి వరకు 1.62 లక్షల ఎంఎస్ఎంఈలకు ప్రాథమిక అనుమతులు లభించాయి. 1.12 లక్షల సంస్థలకు తుది అనుమతులు దక్కాయి. ఆయా సంస్థలకు ఫిబ్రవరి 27 నాటికి రూ. 35,656 కోట్ల రుణాలు మంజూరయ్యాయి.
