2019 నవంబర్లో కొత్త ఉద్యోగాల కల్పన భారీగా పెరిగినట్లు జాతీయ గణాంక కార్యాలయం వెల్లడించింది. ఎంప్లాయిస్ స్టేట్ ఇన్సూరెన్స్ కార్పొరేషన్ (ఈఎస్ఐసీ) వద్ద ఉన్న పే రోల్ డేటా ప్రకారం నవంబర్లో దేశ వ్యాప్తంగా 14.33 లక్షల ఉద్యోగాల కల్పన జరిగినట్లు తెలిపింది. అంతకు ముందు నెల అక్టోబర్లో అది 12.60 లక్షలుగా ఉంది.
1.49 కోట్లు..
గత ఆర్థిక సంవత్సరం (2018-19)లో కొత్తగా ఈఎస్ఐసీకి చేరిన వారి సంఖ్య 1.49 కోట్లుగా ఉన్నట్లు జాతీయ గణాంక కార్యాలయం (ఎన్ఎస్ఓ) తెలిపింది. అదే విధంగా 2017 సెప్టెంబర్ నుంచి 2019 అక్టోబర్ వరకు 3.37 కోట్ల మంది నూతన ఈఎస్ఐసీ సభ్యులు చేరినట్లు తెలిపింది.
ఈఎస్ఐసీ, ఉద్యోగుల భవిష్య నిధి (ఈపీఎఫ్ఓ), పింఛన్ నిధి నియంత్రణ, అభివృద్ధి ప్రాధికార సంస్థ (పీఎఫ్ఆర్డీఏ)ల్లోని వివిధ సంక్షేమ పథకాల ఉద్యోగుల డేటా ఆధారంగా ఈ నివేదిక రూపొందించింది ఎన్ఎస్ఓ.
2018 ఏప్రిల్ నుంచి నూతన ఉద్యోగుల గణాంకాలు విడుదల చేస్తోంది ఎన్ఎస్ఓ. 2017 సెప్టెంబర్కి సంబంధించిన నూతన ఉద్యోగుల గణాంకాలతో ఈ నివేదికలు విడుదల చేయడం ప్రారంభించింది.
ఈపీఎఫ్లో కొత్త సభ్యుల వృద్ధి..
గత ఏడాది నవంబర్లో ఈపీఎఫ్లో నమోదైన కొత్త ఉద్యోగుల సంఖ్య 11.62 లక్షలుగా ఉంది. అంతకు ముందు అక్టోబర్లో ఈ సంఖ్య 6.47 లక్షలు మాత్రమే. 2018-19లో ఈపీఎఫ్ఓ నిర్వహిస్తున్న పలు సంక్షేమ పథకాల్లో మొత్తం 61.12 లక్షల కొత్త సభ్యులు చేరారు. 2017 సెప్టెంబర్ నుంచి 2018 మార్చి వరకు కొత్తగా చేరిన వారి సంఖ్య 15.2 లక్షలుగా ఉంది.
ఇక 2017 సెప్టెంబర్ నుంచి 2019 నవంబర్ నాటికి ఈపీఎఫ్ఓలో కొత్తగా నమోదైన సభ్యుల సంఖ్య 3.03 కోట్లుగా ఉన్నట్లు ఎన్ఎస్ఓ తెలిపింది.
సంఘటిత రంగాల ఉద్యోగ కల్పనలను మాత్రమే ఎన్ఎస్ఓ ఈ గణాంకాలను సేకరిస్తుంది.
ఇదీ చూడండి:పద్దు 2020: వేతన జీవుల జేబులోకి మరింత డబ్బు!
